Deri në vitin 2020 teatrot lokale nuk kanë pasur buxhet të rregullt për staf dhe projekte. Këto institucione janë përballur me greva të aktorëve dhe struktura e tyre udhëheqëse nuk ka qenë asnjëherë e plotë.
Këto janë disa prej gjetjeve të raportit “Dekada e teatrove lokale”, që është prezantuar të premten në kuadër të “Kosovo Theatre Showcase”, raporton KOHA.
Pas prezantimit të raportit është mbajtur diskutimi “Teatrot para, gjatë dhe pas pandemisë”.
Zëvendësministri i Kulturës, Engelbert Zefaj, ka thënë se shumë shpejt do të nisë shpërndarja e mjeteve që Qeveria i ka ndarë si masë emergjente për kulturën në pandemi.
Florent Mehmeti, i cili udhëheq me teatrin e pavarur “Oda” ka thënë se ka një disproporcion të madh sa i përket mbështetjes së teatrove publike dhe atyre të pavarura. Sipas tij, kjo politikë duhet të ndryshojë. Ai ka treguar se “Oda” është dashur të shesë asete e të mos vazhdojë kontrata të punonjësve në mënyrë që të mbijetojë gjatë pandemisë.
Drejtori i Teatrit të Gjilanit, Erson Zymberi, ka thënë se pavarësisht përmirësimit të gjendjes së teatrove të komunave, dallimi në financim midis tyre dhe Teatrit Kombëtar është shumë i madh.
Përfaqësuesit e teatrove kanë kritikuar qasjen e Qeverisë në raport me mbajtjen mbyllur të teatrove.
Pavarësisht shqetësimeve të komunitetit artistik, komuniteti teatror nuk ka shpresë në ndryshimin e qasjes së Ministrisë së Kulturës ndaj teatrove.
“Kosovo Theatre Showcase” do të vazhdojë me shfaqje e ngjarje të tjera deri në fund të javës.
