Skulptura “Identiteti” nga Mulliqi ekspozohet në qendër të Prishtinës

Hapësirës publike të Prishtinës i është shtuar edhe një vepër arti në bronz.

Është “Identiteti” nga Luan Mulliqi, që ka zënë vend në sheshin “Zahir Pajaziti”.

Por, aty do të qëndrojë përkohësisht.

Vetë autori, ekspozimin e kësaj vepre e ka lidhur me një datë të veçantë për të.

“Është një kontribut në artin publik që e kemi, i cili aq shumë është duke na munguar në Kosovë dhe më vjen mirë që është bërë pikërisht në rastin e ditëlindjes së mbesës sime ViVit. Sonte i kremtuam dy ditëlindje, njërën të ViVit, 2 vjeçaren dhe një ditëlindje të një monumenti të frymëzuar nga trashëgimia kulturore çfarë janë edhe hasjanet”, ka thënë Mulliqi.

Në shpalosjen e kësaj vepre ka marrë pjesë edhe ministrja e Kulturës, Vlora Dumoshi. Ajo e ka vlerësuar kontributin e Mulliqit në fuqizimin e gruas shqiptare nëpërmjet artit.

“Veprat e Mulliqit janë gjithnjë të shkëlqyeshme sepse japin një mesazh, çdo vepër e tij të cilën e ka pasur. Kurse e veçanta e skulpturës së hasjaneve është sepse këtu flitet edhe për trashëgiminë tonë, pastaj pjesën e etnografisë e cila është në mënyrë specifike dhe e veçantë, por mbi të gjitha është edhe figura e femrës shqiptare, e cila nëpër shekuj, histori, ka luajtur një rol të rëndësishëm”, ka thënë Dumoshi.

Mulliqi, anëtar korrespondent i Akademisë së Shkencave dhe Arteve të Kosovës ndër të tjera, është autor i shtatoreve të Fehmi Aganit dhe Ismail Qemalit, si dhe i busteve të Bob Doyleit dhe Madeline Albrightit, që të gjitha të vendosura në Prishtinë.