Shirine Morina kujtohet si mjeshtre në skenë e guximtare në jetë

Është përkujtuar aktorja ikonë e komedisë, Shirine Morina, e cila vdiq të dielën, në moshën 72-vjeçare. Vepra e aktores që ka kaluar mbi katër dekada në skenë, në Teatrin Kombëtar të Kosovës është vlerësuar si trashëgimi e rëndësishme për historinë e artit teatror në vend. Bashkëpunëtorë, miq e familjarë në komemoracion, në amfiteatrin e Teatrit Kombëtar të Kosovës, e kanë vlerësuar atë për sharmin në skenë, profesionalizmin dhe guximin

Duartrokitjet e shoqëronin pas çdo shfaqjeje për katër dekada në skenë. Me të njëjtat ovacione, në skenën e Teatrit Kombëtar të Kosovës, u nderua aktorja ikonë e komedisë, Shirine Morina. Ajo vdiq të dielën, në moshën 72-vjeçare. Në institucionin ku u dha jetë shumë roleve është nderuar figura e saj prej artisteje. 

Bashkëpunëtorë, miq e familjarë në komemoracion, në amfiteatrin e Teatrit Kombëtar të Kosovës, e kanë vlerësuar atë për sharmin në skenë, profesionalizmin dhe guximin. 

“I adhuroja edhe dërrasat e skenës së teatrit”, do të thoshte ajo në një intervistë në KTV para më shumë se një dekade. 

Drejtori i Teatrit Kombëtar të Kosovës, Kushtrim Sheremeti, e ka vlerësuar aktoren Morina si njeri të përkushtuar për komunitetin teatror dhe frymëzuese për ta. E ka kujtuar si të butë e të dashur për nga karakteri i saj. 

“Për kolegët e saj ishte mike dhe frymëzuese. Gjithmonë e gatshme për të ndihmuar dhe për të ndarë përvojën e saj me të tjerët. Sot, kur po përjetojmë humbjen e Shirinës, po përjetojmë një zbrazëti të thellë në skenën tonë dhe në zemrat tona. Edhe pse ajo nuk është më në mesin tonë fizikisht, trashëgimia e saj artistike do të jetë gjithmonë me ne duke na frymëzuar dhe udhëzuar në rrugën tonë”, ka thënë ai para të pranishmëve. 

Edhe EXPRESS 16 pri 2024 Përkujtohet Shirine Morina - aktorja ikonë e komedisë

Ka thënë se kujtimi për aktoren nderohet duke promovuar vlerat e teatrit dhe mbahet gjallë shpirti i saj në çdo shfaqje me të cilën arti shprehet e përjetohet. I ka ftuar të pranishmit për duartrokitjet e fundit në teatër për aktoren e ndjerë. 

“Le t’ia japim lamtumirën e fundit duke e kujtuar atë me dashuri, respekt, falënderim për kontributin e saj të jashtëzakonshëm në skenën e teatrit kombëtar të Kosovës dhe në botën e teatrit në përgjithësi e për mënyrën se si aktorët nderohen më së miri në skenë: përmes një duartrokitjeje të përzemërt”, ka thënë Kushtrim Sheremeti, drejtor i TKK-së, institucion që e ka organizuar komemoracionin të hënën pasdite për aktoren Shirine Morina. 

Bashkëpunëtorja e mikja e aktores së ndjerë, Kumrije Hoxha, ka thënë se rolet i luante me mjeshtëri të madhe dhe atyre u përkushtohej. 

“Shirinja ka qenë  një aktore e mrekullueshme. Në çdo rol ka shkëlqyer, por roli i saj i madh ka qenë në ‘Prefekti’, kur e ka luajtur  Hajrinë. E ka luajtur me aq mjeshtëri të madhe, saqë kur dilte në skenë me sharmin dhe guximin e saj, gjë që në jetë ka qenë vullkan i vërtetë, rolin e kishte bërë për mrekulli”, ka thënë ajo.

Përtej skenës e ka kujtuar për bujarinë, guximin e atdhedashurinë. Ka thënë se ajo ishte rritur në frymë patriotike. 

“E mbaj mend në vitin 1967 ishte 27 apo 28 Nëntori, atëherë e festonim në heshtje Festën e Flamurit, por donim të defilonim nëpër shesh, në atë kohë shëtitore. E gjithë vërejtjen e njerëzve e kishte marrë. Ishte 17-vjeçare, në shkollë të mesme. Kishte qëndisur një shqiponjë të madhe në fustan përpara, ecte me krenari, me kokën lart. Ishte shumë sfiduese, por asaj kurrë syri nuk i ishte frikësuar. Dëshira dhe ëndrra e saj kanë qenë bashkimi kombëtar”, ka thënë aktorja Hoxha. 

Vigan Morina, nipi i aktores Shirine Morina, është shprehur se përkrah dhimbjes për humbjen, qëndrojnë kujtimet dhe krenaria që do ta mbajnë gjallë aktoren në zemrat e secilit. 

“Largimi i saj nga kjo botë ka lënë një boshllëk të madh për artin dhe familjen tonë. Janë të panumërta kujtimet për të. Mirësia, bujaria dhe kujdesi i vërtetë që ka treguar ishin cilësitë që e veçonin. Kishte aftësi të jashtëzakonshme për të ofruar shpresë, urtësi, optimizëm e dashuri. Ishte ajo që i theu të gjitha tabutë që nga viti 1965, kur të gjithë ishin kundër saj, por ajo prapë vazhdoi ëndrrën”, ka thënë ai. 

Edhe Kulturë 14 pri 2024 Shirine Morina – aktorja ikonë e komedisë

Aktorja Shirine Morina u lind më 27 maj të vitit 1951 në Prishtinë. Hapat drejt aktrimit do t’i merrte me përgatitjen profesionale në grupin e aktrimit në Shkollën e Lartë Pedagogjike në Prishtinë. Teatrit do t’i bashkohej më 1969, ku do të interpretonte rolet që do ta gdhendnin figurën e saj prej aktoreje. 
Midis të tjerash, ka luajtur si Magjistarja në shfaqjen “Makbethi”, si Zonja në “Ana Karenina”, si Krali në shfaqjen “Me sytë e Kllaunit”, si Gruaja në shfaqjen “Golgota”, si e Bija në “Shtetrrethimi”, si Zhaneti në “Hotel Kashta”, si Meribanja në “Mosha e bardhë” e si plaka Nicë në shfaqjen “Gjenerali i ushtrisë së vdekur”.

Pos në teatër, aktorja Shirine Morina kishte interpretuar edhe në filma, seriale e radiodrama. Rolet e saj përfshijnë edhe projektet: “Era dhe lisi”, “Kur pranvera vonohet”, “Përroi vërshues”, “Qesh e ngjesh”, “Fidani”, “Në autobus”, në serialin “Banda e Luta Fukarasë”, “Pa pengesa” e “Cimerat”.
I takon brezit të artë që kishin kultivuar vlerat e artit skenik, të cilat do të përcilleshin në gjeneratën e re të artistëve. Lamtumira i është dhënë pasditen e së hënës, kur u varros në Prishtinë, në varrezat e qytetit.