Dokumentari “Rikthimi: Një tregim për Bashkësinë Cenacolo” do të vijë në transmetim premierë televizive në Kohavision.
Të shtunën nga ora 20:50 do mund të ndiqni dokumentarin i cili nis me një poezi që e ka shkruar Ganimete Pashoja – Myftiu. Përmes saj ajo shfaq gëzimin për djalin e saj, Fat Myftiu, që ka arritur ta kalojë varshmërinë ndaj teknologjisë.
Dokumentari njëorësh në regji të Leart Ramës është një udhëtim emocional. Shikuesin e mban të mbërthyer për të kuptuar fillimisht varshmërinë e personazheve, pastaj çfarë i ka shtyrë ata drejt saj dhe si ia kanë dalë që ta lënë pas këtë kapitull.
Personazhe të filmit janë edhe Laura Hajdini dhe vajza e saj Dina Hajdini, Bujar Lahu dhe vajza e tij Gresë Lahu, Nol Sahatçiu dhe Berat Safçiu. “Rikthimi...” përmes rrëfimeve të personazheve tregon edhe për bashkësinë “Cenacolo” në Kroaci e që ofron ndihmë për të lënë pas varshmëritë.
Ajo është themeluar në vitin 1983 dhe personazhet Fat Myftiu, Dina Hajdini, Gresë Lahu, Nol Sahatçiu dhe Berat Safçiu kanë qenë pjesë e saj. Gresë Lahu në dokumentar tregon se ka varshmëri ndaj drogës, me të cilën kishte rënë në kontakt kur ishte 15 vjeçe.
Edhe
“Rikthimi...”, dokumentari që hap diskutimin për varshmëritë
“Ato ndjenja kanë qenë mungesa e dashurisë. Nuk kam ditur se si me jep apo se si me lyp dashuri. Kam filluar me e lyp në mënyra të gabuara atë dashurinë që më ka munguar. Fillimisht dashurinë e babait tim. E kam lyp dashurinë në shoqëri të gabuar. Më ka munguar që të flas me dikë edhe ia kam nis me u shit si dikush që nuk jam, t’u u shit e fortë, a këndej tu u ndie e zbraztë”, rrëfen ajo në dokumentar.
Babai i saj, Bujar Lahu, këtë eksperiencë e quan një histori të hidhur. Ka treguar se është pjesë e tyre dhe se u shërben si mësim. Ka treguar edhe pjesët e tij të fajit karshi gjendjes në të cilën kishte rënë vajza e tij. Filmi dokumentar “Rikthimi” shpalos edhe rrëfime të tjera si këto, por të cilat nuk patën një fund tragjik.
