Para dy dekadash ai po tentonte ta finalizonte filmin e tij të parë të gjatë, në të cilin etablohej situata e rëndë socio-politike në Prishtinën e vitit 1998.
Nga një fotografi e botuar në të përditshmen “Koha Ditore”, ishte frymëzuar që ta shkruante skenarin e filmit “Frizerat”, ku paraqitej persekutimi i shqiptarëve nga dhuna e organeve të sigurisë së Serbisë, raporton “Express” i KTV-së.
Regjisori Edon Rizvanolli ka prezantuar për herë të parë në rrjetet sociale sekuenca nga ky film i tij, që nuk pati fatin të realizohej për t’u shfaqur para publikut.
Rizvanolli për emisionin “Express” shpalosi detaje të projektit filmik, i cili i takon zhanrit komedi e zezë dhe luajnë aktorët: Luan Jaha, Armond Morina, Vedat Haxhiislami, Nëntor Fetiu dhe disa të tjerë.
Në filmin “Frizerat”, që ka mbetur në arkiv, shfaqet bashkëjetesa e detyruar e një floktari shqiptar dhe serb që i kishin dyqanet pranë njëri-tjetrit.
Regjisori nga Prishtina konsideron që ky projekt filmik ka potencial për t’u finalizuar.
Anëtari i Akademisë Evropiane të Filmit aktualisht është duke qëndruar në Mal të Zi, në të cilin është i angazhuar për të luajtur rolin kryesor në filmin “Nderi”.
Regjisori Edon Rizvanolli, aktualisht është duke punuar në dy filma të gjatë artistikë, si dhe në një serial ndërkombëtar.