Pronarët e monumentit në Prishtinë e çojnë shtetin në gjykatë

Prishtinë, 8 maj – Monumenti që gjendet krejt afër qendrës së Prishtinës është shndërruar në pikë mosmarrëveshjeje midis institucioneve të trashëgimisë kulturore e pronarëve. Shtëpia e Musli Hoxhës, që gjendet në rrugën “Luan Haradinaj”, qysh në qershor të vitit 2016, bashkë me 12 asete të tjera të trashëgimisë kulturore në kryeqytet ishin futur në listën e “objekteve me rrezikshmëri të lartë”.

E në ditën e parë të shkurtit të vitit 2017, Komuna e Prishtinës e rrethoi me shirit duke bllokuar ecjen në afërsi të saj. Më pas ishte rrethuar edhe me llamarinë. Tentimi i institucioneve të trashëgimisë kulturore për të hartuar një projekt restaurimi e konservimi ka bërë që të dalin në pah mosmarrëveshjet midis shtetit e pronarëve. Krejt çfarë ka mundur të bëjë Qendra Rajonale e Trashëgimisë Kulture në Prishtinë është rrethimi me skele e vendosja e disa shtyllave si ndërhyrje emergjente që monumenti të mos shembet. Tash, gati dy vjet qëndron kësisoj.

Drejtoresha e QRKT-së në Prishtinë, Edona Gashi-Dërguti, ka thënë se procesi i ndërhyrjes në këtë monument nuk mund të ecë përpara shkaku i pronarëve.

“Kemi mbetur të vazhdojë hartimi i projektit sa i përket restaurimit dhe zbatimit të tij. MKRS-ja u ka dërguar letër pronarëve dhe ka kërkuar bashkëpunim. Sipas pronarëve, lënda është dërguar në gjykatë dhe derisa të merret një vendim nuk mund të ndërmarrim asgjë. MKRS-ja ka qenë e gatshme ta hartojë projektin dhe ta bëjë restaurimin”, ka thënë Gashi-Dërguti.

Familja Hoxha vazhdimisht ka insistuar që shteti të bëjë një zgjidhje sa i përket çështjes së banimit të tyre. Shtëpia e ndërtuar më 1927 nuk ofron kushte e siguri për ta, pasi muret e saj janë çarë dhe pjesa ballore ka anuar në drejtim të rrugës.

(Gjerësisht, sot në "Kohën Ditore")