Si mundësi unike për autorët e botuesit vlerësohet Panairi Mbarëkombëtar i Librit Akademik e Shkencor, edicioni i parë i të cilit do të mbahet prej 22 deri më 24 prill në Tiranë, e në edicionet e ardhme pritet të “zhvendoset” edhe në Prishtinë. Ky panair zhvillohet në kuadër të vitit të akademizmit shqiptar, të shpallur në nderim të 50-vjetorit të themelimit të Akademisë së Shkencave të Shqipërisë, si nismë e përbashkët e saj dhe e Akademisë së Shkencave dhe Arteve të Kosovës.
Akademik Vasil Tole ka thënë se kjo ngjarje është një mundësi unike për të bërë bashkë autorët, botimet, institucionet e kërkimit që merren me botimet dhe studimet.
“Mbi të gjitha publikun e gjerë që së bashku të çmojmë rëndësinë që kanë studiuesit, autorët, shkenca për një shoqëri moderne”, citohet të ketë thënë ai.
Panairi Mbarëkombëtar i Librit Akademik dhe Shkencor ka për qëllim t’i bëjë të njohura arritjet më cilësore në botimet akademike, shkencore dhe universitare në të gjithë hapësirën shqiptare, duke synuar një prani përfaqësuese sa më të gjerë.
“Për herë të parë në Akademinë e Shkencave do të kemi një histori të shkencës dhe mendimit shqip, përmes botimeve më të mira të botuara në vite nga akademikët, studiuesit, profesorët shqiptarë, pasi duke u mbështetur fort te shkenca, ne do të kemi një shoqëri dhe një komb më të mirë nesër. Ashtu siç besonte dhe rilindasi ynë i madh, Naim Frashëri: ‘Vetëm drita e diturisë përpara do na shpjerë’”, ka thënë Alda Bardhyli, drejtoreshë e Qendrës Kombëtare të Librit dhe Leximit, që po ashtu bashkorganizon panairin.
Sipas organizatorëve, krahasuar me letërsinë dhe artet, nga vetë natyra e tij, libri akademik dhe shkencor e ka më të vështirë rrugën për të mbërritur te lexuesi. Kjo është një nga arsyet për organizimin e një panairi të dedikuar për të, me qëllim që libri shkencor dhe akademik t’i afrohet lexuesit dhe të lehtësohet komunikimi mes tyre.
© KOHA Ditore