Nëse liria ka emër atëherë varfëria ka mbiemër, sipas artistit “I am I”

Me dy këmbë në një këpucë artisti “I am I” ka dhënë performancën e radhës në kryeqytetin e Kosovës, duke ironizuar me ngjarjet e fundit politike në vend, si një mënyrë për të “goditur” ata, që sipas tij, për shumë vjet popullit ia kanë futur “dy këmbët në një këpucë”.

Ai përball “Luftën e Paqen” dhe “Lirinë e Varfërinë”, përmes sloganeve të shkruara në fanellën e tij të zezë, që nuk janë të vetmet.

“Liria ka emër”, një slogan që shpërtheu në rrjetet sociale ditëve të fundit pas aktakuzave të Gjykatës Speciale ndaj ish-liderëve të UÇK-së ka nxitur artistin që të ironizojë përmes sloganit të tij “Varfëria ka mbiemër”.

Një slogan ky përmes të cilit artisti proteston për varfërinë e shkaktuar pikërisht nga këta liderë gjatë 20 vjetësh qeverisjeje.

“Është një lidhje ironizuese mes sloganit, që unë e quaj patetik ‘Liria ka emër’, duke aluduar që nëse liria si vlerë mbart emrin e tyre/tij, atëherë mbiemri është varfëria që këta/ai e ka sjellë në këto 20 vite”, ka thënë “I am I” për KOHË-n.

E ish-presidenti Bill Clintoni “ishte shikuesi” i vetëm i kësaj performance të realizuar sot, gjë për të cilën artisti shprehet se nuk është i rastësishëm ky lokacion.

“Arsyeja e realizimit tek sheshi Bill Clinton është e qëllimshme, pasi siç e kam potencuar emri i vërtetë i lirisë është NATO dhe Amerika në krye me ish-presidentin Clinton”, shprehet ai.

Përveç ironizimit dhe lojës me sloganet “Lufta dhe Paqja”, “Liria dhe Varfëria”, artisti kërkon edhe drejtësi për mirëqenien tonë, e cila ka munguar përgjatë 20 viteve.

Anash “Varfëria ka mbiemër” ai ka vendosur një bukë në të cilën ka shkruar “Drejtësi për mirëqenien tonë”, e në dorë të djathtë ka shënuar me centë “5/11/2020”, datë në të cilën edhe u është konfirmuar aktakuza Hashim Thaçit, Kadri Veselit e Rexhep Selimit.

E në këtë performancë s’kishte si të mungonte edhe shënjimi i vitit 1999, që në këtë rast paraqitet në semaforë me “99”.

{gallery}