“Drita e Gonxhes” me ndalesë edhe në Prizren

Edicioni i tretë i manifestimit tradicional kulturor – shkencor “Drita e Gonxhes” kushtuar figurës së Nënë Terezës të martën ka zbarkuar edhe në Universitetin “Ukshin Hoti” në Prizren. Në këtë aktivitet janë prezantuar botimet e Institutit të Trashëgimisë Shpirtërore e Kulturore të Shqiptarëve (ITSHKSH) dhe numri i dytë i revistës “Drita” dedikuar humanistes së mbarë njerëzimit.

Biografi i Gonxhe Bojaxhiut, dom Lush Gjergji, ka theksuar se karvani i këtij manifestimi gjatë këtyre ditëve ka bashkuar Shkupin, Prishtinën e Prizrenin në frymën e dashurisë së Nënë Terezës. Sipas tij, ajo ka qenë përfaqësuesja më e mirë në botë e vlerave dhe virtyteve të popullit shqiptar.

“Kështu që Gonxhja jonë është përfaqësuesja, është ambasadorja më e mirë e popullit tonë gjatë gjithë shekujve, sepse në të vijnë në shprehje në nivelin botëror vlerat dhe virtytet tona. Prandaj në Gonxhen ne e gjejmë vetveten dhe të vërtetën, në Gonxhen ne e gjejmë lashtësinë dhe historinë, autoktoninë, në Gonxhen ne e gjejmë një mrekulli e cila ndodh në popullin tonë me mikpritje dhe bujari të rrallë”, ka thënë Gjergji.

Skender Asani, drejtor i Institutit të Trashëgimisë Shpirtërore e Kulturore të Shqiptarëve, ka theksuar se angazhimi i këtij instituti shkon në drejtim të nxjerrjes në sipërfaqe të figurave të shquara të popullit shqiptar, gjithnjë duke pasur parasysh edhe tendencat e të tjerëve për t’i përvetësuar apo tjetërsuar ato. Ai ka theksuar se shqiptarët duhet të mburren me Nënë Terezën.

“Për atë si institucion kemi themeluar institucionin e parë në botë për trashëgiminë e Gonxhe Bojaxhiut - Nënë Terezës, jo vetëm që e kemi parë si borxh, sepse Gonxhja ka lindur në Prizren, familja e saj ka qenë e rrethit të Prizrenit, por edhe dimë ta trajtojmë një figurë markante të popullit shqiptar”, ka thënë Asani.

Profesori Emin Azemi ka përkujtuar se si në të shkuarën në Maqedoninë e Veriut ka ekzistuar një tendencë për përvetësimin e origjinës e prejardhjes së Nënë Terezës që, sipas tij, është shuar tashmë.

“Me themelimin e Departamentit të trashëgimisë për ruajtjen e trashëgimisë dhe studimin e emrit dhe veprës së Nënë Terezës në kuadër të Institutit tonë këto tendenca në njëfarë mënyre janë shuar. Ne nuk e kemi bërë vetëm me fjalë, por edhe më vepra, duke filluar nga një elaborat, të cilin ne si Institut e kemi dorëzuar në Qeveri dhe në Kuvend, me të cilin kemi dashur që emri dhe vepra e Nënë Terezës të shpallet pasuri kombëtare”, ka thënë Azemi.

Angazhimet shkencore të Institutit me seli në Shkup janë vlerësuar edhe nga Xhafer Beqiraj, dekan i Fakultetit të Filologjisë në Universitetin “Ukshin Hoti”.

“Botimet e Institutit janë një dëshmi e përkushtimit dhe vlerave që kemi trashëguar nga paraardhësit tanë. Kjo është një përpjekje e çmuar që do të ndihmojë të forcojmë kujtesën tonë historike, të ruajmë trashëgiminë shpirtërore dhe t’i përcjellim ato vlera te brezat e ardhshëm”, ka thënë dekani Beqiraj.

Ndërkaq Mentor Alishani, rektor i Universitetit “Ukshin Hoti”, është shprehur mirënjohës që manifestimi “Drita e Gonxhes” sivjet po realizohet edhe në Prizren, qytet që ka lidhje të veçantë me familjen Bojaxhiu.

"Humanizmi, dashuria, bamirësia, përkushtimi, paqja, ndihma, sakrifica, frymëzimi, shërbimi dhe jeta e shenjtë janë vetëm disa fjalë që reflektojnë thellësinë e shpirtit të saj dhe ndikimin që pati Nënë Tereza në ndihmën e të varfërve dhe të sëmurëve në mbarë botën”, ka thënë rektori Alishani.

Manifestimi tradicional kulturor – shkencor “Drita e Gonxhes” u hap ditë më parë me aktivitete të realizuara në Shkup dhe në Prishtinë, për të vijuar programin në ditët në vijim me ndalesat në Prishtinë, Letnicë e Tiranë.