Kulturë

Krijimtaria e Bekim Lumit – model i teatrit, mësim për gjeneratat

“Mësimi” është njëra prej shfaqjeve emblematike të Bekim Lumit, por e gjithë krijimtaria që ai ka lënë pas është një teatër më vete, mësim për gjeneratat e reja. Në rrethana normale pa pandemi, përkujtimi i Bekim Lumit sot (e martë) do të bëhej në Teatrin Kombëtar të Kosovës nëpërmjet veprave të tij. Nën titullin “Loja e Lumit” do të ekspozoheshin pjesë të krijimtarisë së tij prej regjisori, studiuesi, gazetari e poeti. Shfaqja e tij “Arturo Ui”, që është në repertor të TKK-së qysh prej premierës në qershor të vitit 2018, do të plotësonte mozaikun e përkujtimit të Bekim Lumit në përvjetorin e dytë të vdekjes së tij. Por shkaku i masave të ndërmarra nga Qeveria e Kosovës për parandalimin e shpërndarjes së koronavirusit, Lumi nuk do të kujtohet përmes një ceremonie publike. Ai vdiq më 30 korrik të vitit 2018 në moshën 52-vjeçare. Por trashëgimia e tij prej artisti vazhdon të jetë e pranishme dhe shërben si një shkollë teatri.

Në pamundësi të ndonjë organizimi publik, siç u përkujtua vitin e kaluar, sivjet ai do të kujtohet në emisionin “Express” të Kohavisionit. Lumi jetonte me artin dhe besonte në të. Shkoi deri në atë nivel, saqë muajve të fundit të jetës relacioni i tij ishte midis Teatrit dhe marrjes së terapisë shkaku i sëmundjes prej së cilës vuante. Përgatiste shfaqjen “Arturo Ui”. Edhe në atë gjendje i shikonte me hollësi detajet.

“Ta bëj një shfaqje në një planet tjetër...”

“Bujar, frymëmarrja nuk është mirë”, ndërhynte ai në mbrëmjen e 13 qershorit 2018, gjatë provës së përgjithshme një ditë para premierës. E kishte brengë frymëmarrjen e aktorit Bujar Ahmeti përderisa për vete mezi ngihej frymë. Në premierë nuk kishte mundësi të merrte pjesë shkaku i gjendjes së vështirë. Por besimi i tij në art e teatër nuk ndalej me kaq.