Që nga mosha tre-vjeçare, ai e zhvillon jetën me ndihmë të karrocës.
Përditshmëria e tij si person me nevoja të veçanta është rrëfyer në filmin dokumentar “Skenari i nënës”, i cili u shfaq premierë në qytetin e Preshevës.
Komunikativ dhe i shoqërueshëm me të gjithë, kështu e përshkruajnë Avni Hetemin, protagonistin kryesor të projektit filmik me regji të Kastriot Saqipit, raporton “Express” i KTV-së.
Ambiciet dhe sfidat e djaloshit preshevar i cili jeton në Zvicër, trajtohen në dyzet minutat e këtij dokumentari që u prezantua në Shtëpinë e Kulturës “Abdullah Krashnica”.
Hetemi, i cili përkundër vështirësive nuk ndalet me karrocën e tij, paraqitet edhe në aktivitetet shoqërore që e bëjnë të ndihet i barabartë me të tjerët.
“Skenari i nënës” synon të prezantohet në festivale prestigjioze të dokumentarëve.
