Në fund të qershorit të vitit 2019, në Akademinë Austriake të Shkencave (Instituti për Ballkanistikë), bashkë me profesor dr. Wilfried Fiedler-in dhe akademik Eqrem Bashën, bëmë përurimin e tri veprave të ASHAK-ut: “Studimet albanistike në botën gjermanishtfolëse” (2018, ff. 861), “Gjurmime kulturë-historike në fushë të shqipes” të Norbert Jokl-it shqip e gjermanisht (2018, ff. 759) dhe “Gramatikë e krahasuar e gjuhëve të Ballkanit I” (krahasimi morfosintaksor-tipologjik i shqipes me gjuhët e tjera të Ballkanit, 2018, ff. 826).
Ishte një festë për studimet albanistike në një vend ku flitet gjermanisht, ku albanologjia ka traditë të gjatë, festë që nuk kishte ndodhur më parë me botimet tona. Ishte meritë edhe e profesor Fiedler-it (anëtar i jashtëm i ASHAK-ut nga 1991, i Akademisë së Shkencave të Shqipërisë nga 2006) që përurimi shënoi atë shkallë përqendrimi dhe interesimi, saqë studiuesit e shquar nga Akademia Austriake e cilësuan ngjarje të dorës së parë, në të cilën ata po bënin bashkë kaq shumë nga kulmet e albanologjisë, shkruan sot Koha Ditore.
Gjatë dy ditëve patëm mundësinë që bashkë me kolegët profesorë Oliver Schmitt, Joachim Matzinger, Heiner Eichner, Robert Pichler, Stephan Schumacher etj. të flisnim për të ardhmen e studimeve albanologjike në ato hapësira. Ishte profesor Fiedler-i ai që e theksonte aspektin fatlum të mundësive që kishim tani për bashkëpunim – nga e gjithë bota shqiptare me të gjithë botën që flet gjermanisht. rrafshin e punës personale biseduam gjerë e gjatë për veprën e tij të re, tashmë të skicuar – “Gramatikë e krahasuar e gjuhëve të Ballkanit II – sistemet emërore”.
(Artikullin e plotë mund ta lexoni në numrin e sotëm të Kohës Ditore)
