“Fusha e mëllenjave” me idealistët e tradhtuar

“Fusha e mëllenjave” me idealistët e tradhtuar

Shaban Maxharraj Shaban Maxharraj 18 July 2019 10:04

Prishtinë, 18 korrik – Si personazh goxha introvert atë duket sikur e gërryen diçka nga brenda.

Nuk bëhet rehat kurrsesi. E kaluara i ka lënë pasoja psikike e fizike. Ato i ndikojnë që dyshimet, vuajtja e pamundësia për të pasur fëmijë ta rrethojnë në secilën ditë.

Syla (Shkumbin Istrefi) është portreti i një të burgosuri politik të viteve ’80 në Kosovë. U takon atyre që kishin ngritur zërin për të kërkuar shtet të pavarur në kuadër të ish-Federatës së Jugosllavisë. Por megjithëse pas burgosjes kishte ikur jashtë vendit, duket sikur burgu është brenda tij. Përgjithmonë. Është punonjës i një fabrike në Britani të Madhe. Lajmet nga Kosova i përcjell shpesh. Aty sheh duke dhënë deklarata edhe një mik të vjetër. Shabani (Astrit Kabashi) tashmë është zëvendësministër i Punëve të Jashtme. Në valën e ikjes së njerëzve nga Kosova, flet se si shtetet perëndimore nuk pranojnë më azilkërkues nga shteti ballkanik. Syla bart fatin e atyre më të sinqertëve që sakrifikuan për vendin e tyre me idealizëm. Pos që nuk mori asgjë si shpërblim, humbi edhe mundësinë që të ketë pasardhës.

Në premierën e filmit “Fusha e mëllenjave” me regji e skenar të Arzana Krajës, të martën mbrëma në Teatrin Kombëtar të Kosovës në hapje të edicionit të 11-të të festivalit ndërkombëtar të filmit “PriFilmFest”, janë ekranizuar vuajtjet e të burgosurve politikë nga perspektiva e ditëve të sotme.

Syla në vitet ’80 kishte një lidhje dashurie me një fqinje të tij në fshat, Zylfijen. Ajo kishte vdekur. Por ai merr vesh që e dashura e tij kishte qenë shtatzënë dhe vendos t’i kthehet vendlindjes me shpresën që një pasardhës i tij jeton diku. Në kërkim e sipër arrin deri te informata se Zylfija, që kishte vdekur më 1989, ishte detyruar të abortonte.

(Gjerësisht, sot në "Kohën Ditore")

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme