“Rrahimi, Rrahimi është”, thonë disa burra teksa vënë në arkivol një kufomë krejtësisht të djegur. Krisma armësh, shtëpi të djegura, erë lufte. Këto janë disa nga sekuencat e filmit dokumentar “The Valley” (Lugina) i realizuar në vitin 1998 nga video-gazetari britanik Vaughan Smith, shkruan sot Koha Ditore.
“Ky dokumentar është bërë me teknologjinë e vjetër filmike që i jepte atij një cilësi të lartë. Them se Kosova është me fat që ka një film të tillë mbi luftën e fundit”, ka thënë Smith me rastin e shfaqjes së tij në Prishtinë. Të premten, në mensën “Ramiz Sadiku” në “Pejton” u mbajt një bashkëbisedim i “Frontline Club Talk” me rrëfimet e gazetarit britanik Smith dhe Elida O’Connell, po ashtu gazetare e cila në kohë lufte ka qenë producente në agjencinë amerikane,“Associated Press”.
Asokohe vetëm 35 vjeç, Smith si kameraman i BBC-së, i kishte vënë detyrë vetes të pasqyronte gjendjen në Kosovë mes flakëve të luftës e krimeve të pashembullta të forcave ushtarake dhe policore serbe.
“Unë isha një video gazetar i pavarur në Londër. Një ditë kur po kthehesha nga aeroporti në shtëpinë time në Londër, taksisti ishte shqiptar dhe quhej Pleurat Sejdiu. Kur e vuri re kamerën time më tha: ‘Ti duhet të shkosh në Kosovë’. Ai e njihte mirë Jashar Salihun që jetonte në Zvicër, dhe i cili kishte kontakte në Drenicë”, ka thënë Smith duke evokuar historinë e tij të raportimit nga Kosova.
(Artikullin e plotë mund ta lexoni sot në “Koha Ditore”)
