Dy persona janë vrarë si pasojë e të shtënave me armë zjarri në një lokal në Klinë.
Zëdhënësi i policisë rajonale për Pejë, Fadil Gashi, ka bërë të ditur se rasti ka ndodhur rreth orës 17:00 në një lokal në sheshin “Mujë Krasniqi”.
Ai ka shtuar se njëri ka vdekur në vendin e ngjarjes, teksa tjetri i plagosur fillimisht është dërguar në spital. KOHA mëson se personi i plagosur po ashtu ka vdekur.
Një person është arrestuar.
Në vendngjarje tashmë janë dy prokurorë të krimeve të rënda.
Kryetari i Klinës reagon pas vrasjes së dyfishtë
Kryetari i Klinës, Zenun Elezaj, ka reaguar pas vrasjes së dy personave të mërkurën në këtë komunë.
Ai ka thënë se ky lajm nuk e ka prekur vetëm familjen e personave të ndjerë.
Elezaj tutje në emër të komunës u ka shprehur ngushëllime familjes e miqve të viktimave.
“Me dhimbje e pikëllim të madh kam marrë lajmin për rastin e sotëm, ku mbetën të vdekur Rexhep dhe Albison Shlivova nga fshati Jashanicë. Ky lajm i papritur e i kobshëm tronditi thellë jo vetëm familjen e dy të ndjerëve, por na preku thellë të gjithëve. Në emrin tim dhe të komunës së Klinës i shpreh ngushëllime të sinqerta familjes Shlivova, miqve dhe të gjithë atyre që i kanë njohur Rexhepin dhe Albisonin”, ka shkruar ai në Facebook.
