Tri raste të dhënies ose marrjes së ryshfetit lidhur me votime, një rast i cenimit të përcaktimit të lirë të votuesve dhe një i cenimit të fshehtësisë së votës janë raportuar në ditën e zgjedhjeve.
Një rast i dhënies ose marrjes së ryshfetit për votë është raportuar se ka ndodhur në Graçanicë ku është arrestuar një person që e ka fotografuar votën dhe ai ka deklaruar se i janë ofruar 50 euro për këtë.
“Është arrestuar i dyshuari mashkull kosovar, pasi që dyshohet se kishte fotografuar fletën e votimit dhe i njëjti deklaron se për këtë i janë ofruar 50 euro. Me vendim të prokurorit i dyshuari është dërguar në mbajtje”, thuhet në raportin 24 orësh të Policisë.
Një rast i ngjashëm ka ndodhur edhe Prizren ku dy persona, njëri në cilësinë e marrësit të ryshfetit e tjetri të dhënësit janë shoqëruar në Polici.
“Janë shoqëruar në stacionin policor dy të dyshuar meshkuj kosovarë, njëri në cilësinë e dhënësit dhe tjetri të marrësit të një shume prej 120 euro në mënyrë që të votohet personi i caktuar. Me vendim të prokurorit pas intervistimit palët janë liruar në procedurë të rregullt”, thuhet në raportin 24-orësh të Policisë.
Ndërkohë në Istog një person dyshohet se ka marrë 10 euro për të votuar një person të caktuar.
“Është arrestuar i dyshuari mashkull kosovar, pasi që dyshohet se ka marr 10 euro që të voton personin e caktuar. Me vendim të prokurorit i dyshuari është liruar dhe rasti shkon në procedurë të rregullt”, thuhet në raportin e Policisë.
Lëshoi raporte mjekësore për asistencë gjatë votimit, intervistohet nga Policia
Në Kllokot është raportuar një rast i cenimit të përcaktimit të lirë të votuesve.
“E dyshuara femër kosovare dyshohet se ka lëshuar raporte mjekësore për asistencë gjatë procesit të votimit, e njëjta është intervistuar në prezencën e avokatit mbrojtës me dyshimin se me veprimet e saja ka kryer veprën penale. Veprimet e mëtejshme hetimore janë ndërmarr në koordinim me Prokurorin e Shtetit, përderisa rasti vazhdon te trajtohet ne procedure te rregullt”, thuhet në raportin e Policisë.
Ndërkohë në Mitrovicë një person është arrestuar dhe pastaj është liruar në procedurë të rregullt pasi dyshohet se ka fotografuar votën.
“Është arrestuar i dyshuari mashkull kosovar, nën dyshimin se i njëjti ka kryer veprën e cekur duke fotografuar votën e tij. I dyshuari është intervistuar dhe më pas me urdhër të prokurorit është liruar në procedure të rregullt”, thuhet në raportin e Policisë.