Tërheqja e hetuesisë nga ndjekja e tre biznesmenëve

Emrat e biznesmenëve Zekë Jasiqi, Arben Krasniqi dhe Astrit Krasniqi kanë qenë në shkresat e hetuesisë si të dyshuar në aferën e mashtrimit e fajdeve, ku janë të përfshirë të dyshuarit Rrahim Hashimi e Kadri Rexhepi. Në vitin 2016, kur Policia e Kosovës fillimisht ka përgatitur kallëzimin penal, të dyshuar ishin gjashtë persona, ndërsa aktakuza e ngritur për të njëjtin rast ka vetëm dy të akuzuar, shkruan sot “Koha Ditore”.

Biznesmeni nga Peja, Zekë Jasiqi, dhe vëllezërit Arben e Astrit Krasniqi, pronarë të lojërave të fatit, kanë qenë të përfshirë në kallëzimin penal të Policisë së Kosovës në vitin 2016.

Prokuroria e Ferizajt, pas pranimit të kallëzimit penal ka anashkaluar plotësisht hetimin ndaj tyre. Aktakuzë për mashtrim e fajde ky institucion u ka ngritur vetëm Rrahim Hashimit e Kadri Rexhepit.

Institucionet e drejtësisë nuk kanë pranuar ta komentojnë këtë çështje. Megjithatë, “Koha Ditore” posedon dy kallëzime penale ku janë të përfshirë edhe emrat e këtyre biznesmenëve, por që në aktakuzë ata nuk përmenden fare.

(Artikullin e plotë mund ta lexoni sot në “Koha Ditore”)