Tre persona kanë mbetur të lënduar rëndë pas një përleshjeje të ndodhur midis tyre dhe tre personave të tjerë, të cilët kanë përdorur edhe mjete të mprehta.
Rasti ka ndodhur gjatë mbrëmjes të së mërkurës në Pejë, derisa njëri nga të lënduarit është transferuar në Qendrën Klinike Universitare të Kosovës, ka bërë të ditur për KOHËN, zëdhënësi i Spitalit Rajonal në Pejë, Naim Sahiti. Ai njoftoi se ekipi shëndetësor po merret intensivisht me dy pacientët e tjerë, të përfshirë në këtë përleshje.
“Tre persona janë pranuar të lënduar me mjete të mprehta. Njëri pacient është transferuar për në QKUK, ndërsa dy të tjerë janë duke i trajtuar momentalisht te ne dhe mjekët kujdestarë po merren intensivisht me këta pacientë”, ka thënë Sahiti.
Për rastin është deklaruar edhe Policia. Në raportin 24-orësh të këtij institucioni, thuhet se zënka midis këtyre personave ishte e çastit.
“Lëndime të rënda trupore kanë pësuar 3 viktimat meshkuj kosovar pasi të njëjtit pas një zënke të çastit që kishin pasur me tre të dyshuar meshkuj kosovar janë sulmuar fizikisht nga ta. Të dyshuarit gjatë rrahjes kanë përdorur mjete të mprehta (thika). Të lënduarit janë dërguar në tretman mjekësorë”, thuhet në njoftimin e policisë.