Sekuestrohen 15 kg heroinë në Ferizaj, arrestohen dy persona

Prokuroria e Kosovës dhe Policia e Kosovës kanë njoftuar se në një aksion të realizuar të hënën në Komunën e Ferizajt janë arrestuar dy persona për shitblerje të substancave narkotike dhe janë sekuestruar 15 kilogramë heroinë. 

“Një operacion i përbashkët me Policinë e Kosovës, i udhëhequr nga Prokuroria Speciale e Republikës së Kosovës, ka rezultuar me arrestimin e dy personave të dyshuar për posedim dhe shitblerje të substancave narkotike.  Aksioni i realizuar sot në Komunën e Ferizajt, me pjesëmarrjen e prokurorit të rastit, Kryeprokurorit të PSRK-së, si dhe njësive  të Policisë së Kosovës, është rezultat i një hetimi të gjatë mbi dyshimet për veprimtari të një grupi të organizuar kriminal.  Gjatë zbatimit të urdhër-kontrollit, autoritetet kanë sekuestruar rreth 15 kilogramë substancë të dyshuar të llojit heroinë. PSRK-ja, në koordinim të plotë me Policinë e Kosovës, do t’i ndërmarrë veprimet e nevojshme hetimore lidhur me rastin”, thuhet në deklaratën e përbashkët të Prokurorisë Speciale dhe Policisë së Kosovës.