Statistikat mbi dhunën në familje tregojnë se numri i rasteve të tilla po rritet nga viti në vit.
Janë bërë dhjetë vjet që nga hyrja në fuqi e Ligjit për ndalimin e dhunës në familje. Nga viti 2008 e deri sot, më shumë se 15 gra janë vrarë, mbi 20 mijë të tjera kanë raportuar dhunë në familje, ndërsa më shumë se 68 për qind e grave kanë përjetuar dhunë në forma të ndryshme.
Statistikat mbi dhunën në familje tregojnë se numri i rasteve të dhunës në familje po rritet nga viti në vit. E pikërisht dhuna ka qenë edhe shkaku kryesor që disa nga këto raste kanë përfunduar me fatalitet.
Sipas Policisë së Kosovës, vetëm në gjashtëmujorin e parë të vitit 2018 janë evidentuar 628 raste. Ndërkaq, çdo paraqitje në polici trajtohet në bazë të procedurave dhe të njëjtat procedohen në organet e drejtësisë.
Kapitene Tahire Haxholli, udhëheqëse e Njësisë për Hetime rreth Dhunës në Familje në kuadër të Policisë së Kosovës, për Radio Kosovën thotë se gratë janë vetëdijesuar dhe po i raportojnë rastet e dhunës.
“Nuk ka asnjë raportim i një viktime, e sidomos i gruas që thotë se i ka ndodhur dhunë për herë të parë dhe për këtë i jam drejtuar Policisë së Kosovës”, deklaroi Haxholli.
Megjithatë janë raste të shumta kur drejtësia nuk ka arritur t’i mbrojë gratë, pasi ato, edhe pse kanë hapur rastet, janë bërë viktimë e burrave të tyre, thotë Haxholli.
“Në këtë gjashtëmujor ndoshta edhe me vite të tëra nuk kemi pasur një numër kaq të madh të vrasjeve. Brenda familjes janë 6-7 raste”, shtoi ajo.
Çdo vit ka rritje për 100 raste të lajmërimit të dhunës në familje.
