Prokuroria ngrin pasuri mbi 10 milionë euro në rastin ‘’Prona e Veternikut’’

Prokuroria Themelore në Prishtinë ka njoftuar se në rastin e njohur si “Prona e Veternikut”, gjatë zhvillimit të hetimeve me datë 13.10.2025 ka ngrirë pasuri në vlerë mbi 10 milionë euro duke lëshuar urdhër ndalues të përkohshëm për gjithsej 7 hektarë tokë. Gjithashtu Prokuroria ka bërë të ditur se ka kërkuar nga gjykata që të lëshojë urdhrin përmes të cilit deri në përfundimin e procesit gjyqësor t’ua ndalojë personave që kanë interes shitjen, transferimin, dhurimin, zvogëlimin dhe ngarkimin e pronës në fjalë.

“Prona prej 7 hektarësh është pasuri e specifikuar për të cilën ka dyshim të bazuar se është përfituar me vepër penale”, thuhet në njoftim.

Prokurori i Shtetit, bëhet e ditur se është duke i zhvilluar hetimet me intezitetin me të lartë dhe për të pandehurit A.G, Y.H dhe M.G ka nxjerrë vendim për zgjerimin e hetimeve edhe në drejtim të veprës penale “Falsifikim i dokumenteve” dhe “Deklarimet e rreme”.

Në shtator, Themelorja kishte lëshuar urdhrin ndalues përfundimtar për 3 hektarët tjerë.

Prona, për të cilën “Betimi për Drejtësi” kishte raportuar më 13 shtator 2021, dhe kishte zhvilluar debat në emisionin “Tempus” në KTV, dyshohet se iu është marrë N.S. dhe G.S. përmes mashtrimit dhe dokumenteve të falsifikuara. Për këtë po hetohen Y.S. dhe A.G.. Tash pas zgjerimit të hetimeve për pjesën tjetër të pronës, po hetohet edhe M.G..