Nis shqyrtimi fillestar ndaj të akuzuarve për futjen e gazit lotsjellës në Kuvend

Ka nisur shqyrtimi fillestar kundër të akuzuarave Albulena Haxhiut, Pal Lekajt, Besa Baftiut e Donika Kadaj-Bujupit të akuzuar për futjen e bombolave të gazit në Kuvendin e Kosovës.

Për shkak të vonesës së të akuzuarës, Donika Kadaj-Bujupi seanca ka nisur me 10 minuta vonesa.

Avokati Arianit Koci ka thënë se nuk ështe i kompletuar me prova pasi prokuroria nuk ia ka dorëzuar të gjitha provat.

"Mungon vërtetimi mbi marrjen e përkohshme të sendeve 19 shkurt 2016 si dhe fotodokumentacioni i dorëzuar nga prokuroria" ka thënë Koci.

Prokuroria në shkurt të vitit 2016 kishte ngritur aktakuzë ndaj Albulena Haxhiu, Besa Baftiu, Donika Kadaj Bujup e Pal Lekaj, me akuzat se kishin futur bombola të gazit në Kuvendin e Kosovës duke e kryer veprën penale armëmbajtje pa leje.

Aktakuza ka të bëjë me kohën kur partitë atëherë në opozitë, Vetëvendosje, AAK dhe Nisma kundërshtonin marrëveshjen Kosovë-Mali i Zi për demarkacionin e kufirit dhe marrëveshjen Kosovë -Serbi për themelimin e Asociacionit të Komunave me Shumicë Serbe.