Gjykata liron nga akuza shefin e prokurimit në Komunën e Prizrenit

Isa Osmankaj, që në cilësinë e shefit të Zyrës së Prokurimit në Komunën e Prizrenit akuzohej për keqpërdorimin e pozitës apo autoritetit zyrtar lidhur me implementimin e një kontrate të shenjëzimit, të premten është liruar nga akuza nga Gjykata Themelore e Prizrenit.

Trupi gjykues gjatë shpalljes së aktgjykimit lirues ka bërë të ditur se gjatë procesit gjyqësor nuk është provuar se i akuzuari ka kryer veprën penale për të cilën është akuzuar nga Prokuroria Themelore në Prizren.

Aktakuza e Prokurorisë Themelore në Prizren ngarkonte Isa Osmankajn se prej muajit maj 2017 e deri në muajin maj të vitit 2018, nuk i ka përmbushur kompetencat e tij me qëllim të përfitimit të çfarëdo dobie për personin tjetër, dhe se me dije ka shkelur ligjin lidhur me detyrat e tij si dhe për tejkalim të kompetencave të tij, në atë mënyrë që në kundërshtim me dispozitat e ligjit mbi Prokurimin publik, ka lejuar implementimin e një kontrate të shenjëzimit që Organi Shqyrtues i Prokurimit e ka shpallur jo ekzistente. Sipas Prokurorisë, në këtë mënyrë, i pandehuri ka vepruar në kundërshtim me dispozitat e Ligjit mbi Prokurimin Publik dhe me dispozitat e Ligjit mbi Financat Publike, duke i mundësuar Operatorit ekonomik zbatimin e një kontrate jo ekzistente në vlerë prej 358 mijë euro, nga e cila kontratë deri me datën e kryerjes së ekspertizës janë realizuar punë në vlerë prej 163 mijë euro, dhe se me këto veprime ka kryer veprën penale “Keqpërdorimi i pozitës apo autoritetit zyrtar”.

Mirëpo kryetarja e trupit gjykues, Ajsere Skenderi gjatë shpalljes së aktgjykimit ka bërë të ditur se Gjykata ka vërtetuar se në veprimet e të akuzuarit nuk krijohen elementet esenciale të veprës penale për të cilën është akuzuar.

Aktakuza kundër shefit të Zyrës së Prokurimit në Komunën e Prizrenit ishte ngritur nga Prokuroria Themelore e Prizrenit në maj të vitit 2019.