Një person me inicialet R.A. ka përdorur forcën dhe kanosjen për të detyruar të miturën A.L. të kryejë marrëdhënie seksuale me të, pa pëlqimin e saj.
Sipas një njoftimi nga Prokuroria Themelore në Gjilan, i dyshuari ka goditur viktimën në pjesë të ndryshme të trupit me ç’rast viktima ka kërkuar ndihmë mjekësore në Spitalin e Gjilanit dhe më pas në QKUK.
“Për këtë çështje, Prokurori i rastit, nga Departamenti i Krimeve të Rënda, ndaj të dyshuarit, ka nxjerrë aktvendim për fillimin e hetimeve dhe ka ushtruar kërkesën për caktimin e paraburgimit, në gjykatën kompetente në Gjilan, për shkak të veprës penale ‘dhunimi’, e cila është e sanksionuar në nenin 230 paragrafi 4 nën paragrafi 4.3 lidhur me paragrafin 1 dhe 2 të Kodit Penal të Republikës së Kosovës. Kërkesën e Prokurorisë për caktimin e paraburgimit, Departamenti i Krimeve të Rënda në Gjykatën Themelore në Gjilan, e ka refuzuar si të pabazuar, prandaj Prokuroria Themelore në Gjilan, kundër këtij aktvendimi të gjykatës, brenda afatit ligjor ka paraqitur ankesë, në gjykatën e shkallës së dytë – Gjykatën e Apelit në Prishtinë”, thuhet në njoftimin e Prokurorisë Themelore në Gjilan.