Arrestohet edukatorja ku vdiq 3-vjeçari në kopshtin privat në Fier

Një 27-vjeçare me iniciale R.B., edukatore në kopshtin privat “Flatrat e Dijes” në Fier, ku një ditë më parë ndërroi jetë një fëmijë 3-vjeçar, është arrestuar nga policia.

Sipas autoriteteve, i mituri ka humbur jetën aksidentalisht në një kohë kur do duhej të ishte në mbikëqyrjen e edukatores.

“Specialistët për Hetimin e Krimeve në Komisariatin e Policisë Fier, nën drejtimin e Prokurorisë së Rrethit Gjyqësor Fier, arrestuan shtetasen R.B., 27 vjeçe, banuese në Fier, pasi në kopshtin privat ku punon si edukatore, ka humbur jetën aksidentalisht fëmija i mitur 3 vjeç, i cili duhej të ishte nën mbikqyrjen e kësaj shtetaseje. Materialet i kaluan Prokurorisë, për veprime të mëtejshme procedurale”, njofton policia.

Dyshimet janë se fëmija është mbytur në momentin kur është zgjatur për të marrë një veshje në varësen e rrobave, në të cilën ka ngecur kapuçi i xhupit. Sipas policisë, fëmija është rrëzuar në këtë moment duke u mbytur prej xhupit.

Ai u gjet i shtrirë nga edukatoret në ambientet e kopshtit duke e dërguar urgjentisht në spital, por ka qenë e pamundur për mjekët pasi fëmija ka mbërritur pajetë aty. Daja i vogëlushit ka shpjeguar se si në mëngjes fëmija është dërguar në kopsht dhe në mesditë i kanë marrë në telefon dhe u kanë thënë se fëmija nuk është mirë. /ABCNews.al/