Arrestohen tre shtetas të huaj në Prishtinë, dyshohet se tentuan të vidhnin në një market

Janë arrestuar tre shtetas të huaj në Prishtinë, pasi mbrëmë rreth orës 22:00, ata dyshohet se kanë thyer xhamin dhe me forcë kanë depërtuar brenda një marketi në Prishtinë.

Policia ka treguar se pas veprimit të shpejt ka arritur të arrestojnë shtetasit e huaj, B.B. (20-vjeçar), I.K. (34-vjeçar) dhe M.A. (31-vjeçar), të cilët janë dërguar në mbajtje. Rasti është cilësuar si tentim vjedhje.

“Mbrëmë rreth orës 22:00, kemi pranuar informatën për një rast të vjedhjes së rëndë në tentativë, që ka ndodhur në një market në rrugën Ilir Konushevci në Prishtinë. Rastit menjëherë i janë përgjigjur njësitet policore, të cilat kanë arritur të identifikojnë dhe arrestojnë tre persona të dyshuar. Mbështetur në rezultatet fillestare të hetimit dyshohet se personat e dyshuar kanë thyer xhamin dhe me forcë kanë depërtuar brenda marketit. Ka qenë aksioni i shpejtë i policisë ai që ka rezultuar me arrestimin e personave të dyshuar vetëm pak kohë pas raportimit të rastit. Aktualisht hetuesit policor po kryejnë veprimet e nevojshme hetimore dhe procedurale me qëllim të sqarimit dhe zbardhjes së të gjitha rrethanave që karakterizojnë këtë ngjarje, ndërkohë që personat e dyshuar: B.B. 20 vjeç, I.K. 34 vjeç, M.A. 31 vjeç, që të tre shtetas të huaj me urdhër të prokurorit janë dërguar në mbajtje”, ka njoftuar Policia e Kosovës.