Vrasjet në Velipojë, arrestohen dy të plagosurit

Policia e shtetit shqiptar ka arrestuar në flagrancë dy nga të plagosurit e ngjarjes së rëndë që ndodhi dje në Velipojë, ku si pasojë e një konflikti për të drejtën e hapësirës ranore pranë hoteleve të tyre u vranë katër persona.

Bëhet fjalë për Hasan Ferracakun, 54-vjeç, lindur në Trush dhe banues në Pulaj, Velipojë, si dhe nipi i tij shtetasi Elmilind Dyli, 17-vjeç, lindur e banues në fshatin Guri i Zi të Shkodrës.

Dy shtetasit që ndodhen në Spitalin e Traumës në Tiranë, janë të dyshuar për kryerjen e veprave penale vrasja në rrethana të tjera cilësuese, kundër dy ose më shumë personave dhe prodhimi dhe mbajtja pa leje e armëve luftarake dhe municionit, e kryer në bashkëpunim.

Po ashtu, janë shpallur në kërkim vëllezërit A. V., Sh. V. dhe B. V., banues në Pulaj të Velipojës, të dyshuar si bashkautorë në këtë ngjarje, për kryerjen e veprave penale vrasja në rrethana të tjera cilësuese, kundër dy ose më shumë personave dhe prodhimi dhe mbajtja pa leje e armëve luftarake dhe municionit, në bashkëpunim.

Në cilësinë e provës materiale janë sekuestruar dy armë zjarri pistoleta, njëra prej të cilave u gjet në vendngjarje, ndërsa tjetra u gjet gjatë kontrollit në hotelin e familjes Gocaj.

Grupi hetimor, nën drejtimin e Prokurorisë, vijon punën për zbardhjen e plotë të rasti, identifikimin dhe kapjen e personave të tjerë të përfshirë në konfliktin me armë, thuhet në njoftimin e Policisë së Shtetit në Facebook.

Në ambientet e teatrit “Petro Marko” në Vlorë, sot është zhvilluar Asambleja e Partisë Socialiste, pjesë e së cilës ishte edhe kryeministri Edi Rama.

I pyetur për ngjarjen që tronditi mbrëmjen e së shtunës, Velipojën, ku mbetën të vrarë katër persona dhe dy të tjerë u plagosën, pas një konflikti për shezllonet, kryeministri nuk dha një koment të drejtpërdrejtë, por u shpreh i shqetësuar për bashkitë që kanë detyrime ekstra dhe që janë të lidhura me industrinë e turizmit.

Rama po ashtu u shpreh se nuk ka kohë për të humbur dhe se ka thirrur në takim ministrin e Brendshëm dhe disa nga drejtuesit kryesorë të policisë për një fazë të re ristrukturimi.

“Sa i përket administrimit të vogël, unë jam i shqetësuar jo vetëm për Vlorën, por për bashkitë që kanë detyrime ekstra dhe që janë të lidha me industrinë e turizmit. Dhe për këto kemi folur. Kam thirrur ministrin e Brendshëm dhe disa drejtuesit kryesorë të policisë, për të mos humbur kohë dhe për të lansuar sa më shpejt një fazë të re të ristrukturimit që është përgatitur dhe që për arsye të mirëkuptueshme është momenti që të përshpejtohet me disa javë, dhe të mos presim fundin e verës”, ka thënë Rama.

Kreu i Partisë Demokratike Lulzim Basha ka reaguar për përplasjen me armë në Velipojë që rezultoi në katër të vrarë e dy të plagosur. Në një postim në Twitter, Basha shkruan se jeta e qytetarëve është në rrezik pasi policia, sipas tij është reduktuar “në një vegël të regjimit për të mbrojtur pushtetin.”

Kryedemokrati i drejtohet kryeministrit Edi Rama, duke thënë se ”përgjegjësi për këtë situatë nuk e fsheh dot përgjegjësinë e tij’’.

“Kur policia reduktohet në vegël të regjimit për të mbrojtur pushtetin dhe lidhjet me krimin, kur përgjigja e vetme sa herë përgjaken qytetet tona është “hëngshin kokat e tyre”, jeta e qytetarëve, fëmijëve dhe familjeve shqiptare është në rrezik. Me postimin cinik si i sotmi pas masakrës së Velipojës, përgjegjësi për këtë situatë nuk e fsheh dot përgjegjësinë e tij, por vetëm rikonfirmon gjunjëzimin e shtetit para krimit të bërë njësh me pushtetin e tij të korruptuar deri ne palcë”, ka shkruar Basha në Twitter.

Ndërkohë, presidenti Ilir Meta ka reaguar në lidhje më ngjarjen e rëndë që ndodhi orët e para të së dielës në Velipojë ku pas një përplasjeje me armë mbetën të vrarë katër persona dhe dy u plagosën. Në një postim në Facebook, kreu i shtetit shkruan se kjo është një tjetër ngjarje tronditëse që kërkon hetim të plotë të rrethanave dhe shkaqeve.

Meta shprehet se këto konflikte me armë zjarri që ndodhin në ambiente publike në kulmin e sezonit turistik, “vënë në rrezik jetën dhe shëndetin e dhjetëra qytetarëve, por nga ana tjetër dëmtojnë seriozisht imazhin e Shqipërisë tek turistët vendas dhe të huaj.”

Presidenti bëri thirrje që secili autoritet i lartë shtetëror duhet të mbajë përgjegjësitë e tij të detyrës dhe të heqë dorë nga ajo që kreu i shtetit e cilëson si “propagandë cinike që nuk mbulon dot të vërtetat që i shohim të gjithë.”

Rendi dhe siguria publike është dëmtuar seriozisht, shprehet Meta ndërsa bën thirrje për masa të reja efektive për garantimin e tyre, me qëllim mbrojtjen e jetës, shëndetit dhe të pronave të qytetarëve.

20-vjeçari që u vra në Velipojë kishte nisur dje punën si kamarier

Detaje të reja zbardhen nga ngjarja e rëndë me katër të vdekur dhe dy të plagosur në Velipojë. Policia e Shtetit ka shpallur në kërkim edhe dy shtetas të tjerë si të përfshirë në ngjarjen e rëndë të cilët dyshohen se ishin bashkë me vëllezërit Ferracaku. Ndërkohë janë rreth 20 persona të shoqëruar deri më tani si shtetas që mund të kenë dijeni të mëtejshme rreth konfliktit që çoi në përplasjen me armë mes vëllezërve Ferracaku dhe Gocaj. Po ashtu mësohet se në këtë ngjarje mund të jenë përdorur deri në 6 armë.

Vëllezërit Ferracaku kanë pasur secili nga një pistoletë sipas dyshimeve dhe dy personat në kërkim dyshohen se kanë qenë të armatosur. Nga ana tjetër edhe vëllezërit Gocaj kanë pasur njeri pistoletë dhe tjetri automatik kallashnikov. Policia ka sekuestruar vetëm një pistoletë deri më tani dhe disa prej gëzhojave që janë nga disa armë të ndryshme.

Të vrarë pas konfliktit që dyshohet se nisi për hapësirat në plazh mbetën Kujtim Ferracaku dhe u plagos nipi i tij Elmilind Dyli, 17 vjeç ndërsa u plagos edhe Hasan Ferracaku, vëllai i tij. Nga pala tjetër mbetën të vrarë vëllezërit Edmond Gocaj dhe Xhovan Gocaj si dhe shtetasi Myzerin Zeneli, 20 vjeç i cili një ditë më parë kishte nisur punën si kamerier në plazhin e Velipojës. /BalkanWeb

Pjetër Gocaj, babai i dy djemve të vrarë mbrëmjen e djeshme në hotelin e familjes Gocaj në Velipojë pas një konflikti me armë, ka folur këtë të dielë për mediat duke treguar se përplasja ka ndodhur për hapësirën publike në plazh.

“Më kanë vrarë djemtë, kjo që më kanë ndodhur mua të mos i ndodhë askujt”, kështu është shprehur Gocaj, babai i dy djemve të vrarë.

Ai theksoi se djali i madh i tij ishte me dokumente angleze dhe se kishte ardhur në Velipojë për të investuar.

“Shezllonet i kam vendosur që në qershor po në sipërfaqen ku i kam pasur vjet. Gjatë qershorit ka filluar ndarja. Unë nuk mund të kundërshtoj asgjë sepse të gjitha janë me dokumente. Ne i kemi vendosur shezllonet përpara se të bëhej ndarja nga shteti dhe ishim në pritje kur të vendosej kjo ndarje për të shikuar se ku i kemi ne dhe ku i kanë ata. Kjo që ka ndodhur mos i ndodhtë më kujt, mua më është fikur dera e shtëpisë. Nuk e kuptoj si ka ndodhur konflikti, por e di që për shezllone. Më kanë vrarë te dera e shtëpisë, më kanë vrarë dy djemtë. Çfarë më duhet jeta më. Vitin e kaluar i kam pasur unë shellonët, këtë vit ia kanë dhënë atij. Ne kemi pritur që të ndahen shezllonet sepse kanë qenë pa u ndarë ende, ata kanë ardhur dhe na vranë në shtëpi. Uroj mos t’i ndodhë më kujt se peshën e rëndë të kësaj ngjarje e kam unë mbi supe. Asgjë nuk dimë. Më kanë vrarë djemtë”, tregon ai.

Gocaj gjithashtu tregon se fillimisht i kanë vrarë djalin e madh, menjëherë dhe më pas ka qëlluar dhe djali tjetër. Pjetri thotë se nuk e ka pritur këtë ngjarje, pasi i ka pasur shok palën me të cilët ka ndodhur përplasja, pra familjen Ferracaku.

“Ata erdhën dhe qëlluan djalin e madh të parin që ishte me dokumente angleze i cili ka ardhur për të investuar dhe punuar. Pastaj qëlluan edhe djalin tjetër, djali i dytë i ka qëlluar edhe ai. Kur ka ndodhur nuk kam qenë këtu, por nuk kanë ardhur për të folur përderisa kanë ardhur me armë tek dera e shtëpisë. Uroj mos t’i ndodhë më askujt”, tha ai. /ABC

Një ngjarje e rendë ka ndodhur në plazhin e Velipojës.

Katër persona kanë mbetur të vrarë dhe dy të tjerë janë plagosur.

Ngjarja është shënuar pas mesnatës rreth orës 01:30 të 27 qershorit.

Dyshohet se konflikti ka nisur për hapësirat publike në plazh, mes pronarëve të dy hoteleve. Viktimat kanë qenë anëtarë të familjes Ferracaku dhe Gjocaj.

Viktima e ngjarjes:

Më datë 27.06.2021, rreth orës 00:30, në Pulaj Plazh, Velipojë, si pasojë e një konflikti të çastit, i cili është përshkallëzuar në përdorim të armës së zjarrit kanë mbetur të vrarë, shtetasit K. V. 59 vjeç, Xh. G. 25 vjeç , E. G. 38 vjeç dhe M. Z. 20 vjeç.

Si dhe janë plagosur shtetasit H. V. 54 vjeç, dhe E. D. 17 vjeç, të cilët dyshohen si autorë të përfshirë në konfliktin e armatosur. /TCH