Është arrestuar në Prishtinë një 21-vjeçar i dyshuar për një grabitje në një market në kryeqytet në nëntor të vitit të kaluar.
Policia e Kosovës ka njoftuar se i dyshuari është dërguar në mbajtje për 48 orë.
Ai akuzohet se më 17 nëntor të vitit të kaluar, në një market në Prishtinë, kishte bërë grabitje të armatosur, ku një gruaje nën kërcënimin e një arme i kishte grabitur një shumë parash.
“Policia e Rajonit të Prishtinës në vazhdën e masave dhe veprimeve policore që po ndërmerr me qëllim parandalimin e rasteve kriminale si dhe kapjen e personave të dyshuar si autor të veprave të inkriminuara, sot në bashkëpunim me Drejtorinë e Policisë në Gjilan kanë arrestuar një person të dyshuar për grabitje të armatosur. Ngjarja ka ndodhur më 17.11.2020, në një market në Prishtinë, ku viktimës femër nën kërcënimin e armës i janë grabitur një shumë parash. Ndaj personit të dyshuar: D. D, mashkull, 21 vjeç, shtetas i Republikës së Kosovës, janë kryer veprimet hetimore të kësaj faze si dhe ato operativo-policore dhe i njëjti në përputhje me aktvendimin e nxjerrë nga prokurori i shtetit është dërguar në mbajtje për 48 orë”, thuhet në njoftimin e Policisë.
