Emërtimi i një projekti për shtrimin e rrugës me kubëza në emër të shefit të kuvendarëve të LVV-së në Podujevë, Haki Rudari, ka kaluar në akuza e kundërakuza ndërmjet disa kuvendarëve të LDK-së dhe Rudarit. Këshilltari nga radhët e LDK-së, Qëndrim Softolli, ka thënë se e përgëzon shefin e Grupit të LVV-së për emërtimin e rrugës me emër të tij.
“Ndoshta nuk i ka ra me prit gjatë, qe 3 vjet ka ardhë në pushtet...Unë e kam dokument zyrtar të Komunës së Podujevës, ‘ndërtimi i rrugës të Haki Rudarit’. Rruga Haki Rudari, urime”, ka thënë Softolli derisa po diskutohej për projektbuxhetin e vitit 2024.
Rudari e ka ndërprerë duke i thënë se “po rren” dhe se nuk ka rrugë me emrin e tij.
Softolli i ka thënë se e di që nuk ka rrugë me këtë emër. Por, sipas tij, në projekt është “ndërtimi i rrugës Haki Rudari”.
“Shkaku i moshës unë nuk mund të referohem ty po rren, po faktet janë ndryshe”, ka thënë Softolli.
Situatën është munduar ta qetësojë disa herë kryesuesi i Kuvendit, Hilmi Hoxha, po nuk ka mundur.
“O Haki Rudari, po prit te kryen e tani merr fjalën edhe i thua ato që ke me i thanë. Të kesh durim. Kadal bre. Mos u ngutni, se asnjë rrugë nuk mund të ndërrohet (emërtimi v.j.) pa ardhë në Kuvend. Unë nuk e di çka kanë ba”, ka theksuar Hoxha.
Por, Rudari nuk është ndalë.
“Thuaj të vërtetën nuk është problem, po jo gëshnjeshtër”, është shprehur ai.
Softolli ka paralajmëruar se nëse edhe njëherë ia ndërprenë fjalën “e lirojmë sallën krejt si grup”.
Të njëjtën çështje e ka vazhduar edhe Ekrem Rrahmani nga LDK posa e ka marrë fjalën.
“Edhe për këtë rrugën që the rrenc e pa rrenc, ti drejtorit ndalja mundësinë. Në tender shkruan, ta kallxoj me metra Haki sa e ki rrugën. Këtu shkruan ‘ndërtimi i rrugës Haki Rudari Shjkofc’. Unë kam mendua që naj babëgjysh i yti e ka pas emrin Haki e ia keni lanë emrin rrugës, s’e kam dit që ia keni lanë rrugës. Është e vërtetë që në ‘Google maps’ nuk e kam gjet rrugën, po e ka emërtuar drejtori kështu që ta shtrojë rrugën”, është shprehur Ekrem Rrahmani. “Ai vjen sivjet ta shtron, edhe shkollën po ta marojkan edhe një bust në mujsh me gjetë me ngjit qatje edhe për ty u kry. Ja ku e ki edhe tjetrën, ‘ndërtimi i rrugës Artrit Mulliqi’. Ka edhe tjerë emra, po tjerët çka janë jashtë Kuvendit nuk po i përmendi, le të delë edhe ky të thotë po rren. Kish pas këtu edhe drejtorë që kishin përfituar lopë në emër të babëgjyshit. Mos na shtini në personale se krejt i dimë”.
Por, Rudari ka insistuar se nuk ka rrugë me emrin e tij.
“Emri Haki Rudari nuk ekziston dhe është rrenë. Gjema komisionin që e ka emërtuar Haki Rudari. Po e përsëris, në Shajkofc nuk ka emër Haki Rudari. Po kërkesa kam sjell, po asnjë kërkesë nuk është rruga Rudari. I kam sjell tri kërkesa dhe ato familje qe 20 vjet janë anashkalua dhe janë familje të dëshmorëve”, ka deklaruar Haki Rudari.
Edhe këshilltari Artrit Mulliqi (LVV), ka thënë se është bërë një gabim teknik kur është emërtuar projekti me emrin e tij. Ka thënë se ajo nuk është rruga ku ai banon, por është kërkesë e banorëve e që e ka dorëzuar ky në Komunë.
Njësoj ka thënë edhe drejtori për Shërbime Publike, Mbrojtje dhe Shpëtim, Bahri Selimi. Sipas tij, janë 81 rrugë që kanë hy në projektin e shtrimit të rrugëve me kubëza.
“Këresat kanë ardhë edhe nga këta dy dhe gabimi teknik është që kërkesa është marrë me emër të tyre. Kërkesa nuk është për rrugën e Hakiut, është për një lagje krejt tjetër. Ndërsa kërkesa për rrugën Artrit Mulliqi, është për fshatin Sallabajë, nuk është as për qytet (ku banon ai v.j.). Unë ndihem mirë që kërkesat e qytetarëve vijnë nga ju. Në këto 81 rrugë ka edhe prej të gjithve këtu, e nuk u përmendën emrat. Gabimi është bë se ato kërkesa që kanë ardhë unë i kam dorëzuar te inxhinieri për të bërë paramasën dhe ai nuk ka dit si t’i emërtojë dhe i ka shkru në kode me ata emra”, ka thënë Selimi.
© KOHA. Të gjitha të drejtat janë të rezervuara.
