Kuvendarët e Lëvizjes Vetëvendosje në Obiliq kanë akuzuar kolegët e tyre të Iniciativës Qytetare (IQ) për “vjedhje” të propozimit për faljen e 100 eurove të tatimit në pronë për qytetarët e kësaj komune për vitin 2023.
Sipas asamblistëve të VV-së gjatë seancës së jashtëzakonshme që e kishte thirrur LVV-ja e mbështetur edhe nga këshilltarë komunalë të partive tjera, nuk ishte miratuar propozimi për faljen e 100 eurove të para për qytetarët e Komunës së Obiliqit. Por, ata kanë akuzuar partinë në pushtet (IQ) se kishte bërë një propozim tjetër që ishte i ngjashëm me atë të VV-së, por duke e shtuar edhe një pikë tjetër, që të kthehet vlera e pronës si në 2022.
“Ne si Vetëvendosje, të mbështetur edhe nga disa këshilltarë të partive tjera e kemi thirrur këtë seancë të jashtëzakonshme që t’i rekomandojmë nivelit qendror faljen e 100 eurove të tatimit në pronë për të gjithë qytetarët e Obiliqit. Por, në seancë partia në pushtet nuk e përkrahur propozimin tonë, por e përvetësoi atë duke ia shtuar edhe një pikë tjetër që për neve ishte kontradiktore me të parën”, ka thënë shefi i asamblistëve të VV-së në Obiliq, Sami Ahmeti.
Megjithatë, shefi i GK të LVV-së, ka thënë se e rëndësishme është që propozimi për faljen e 100 eurove ka kaluar.
KOHA i ka pyetur zyrtarët komunalë rreth akuzave të Vetëvendosjes, por ata në vend të përgjigjeve e kanë dërguar njoftimin për mbajtjen e kësaj seance. Aty nuk përmendet fare propozimi i LVV-së.
“Me propozimin e shefit të Grupit Iniciativa Qytetare, Enver Gashi, u hodh në votim, dhe me 10 vota pro, 1 abstenim kaluan dy rekomandimet për ministrin e Financave, Punës dhe Transfereve, që të na plotësojë me infrastrukturë ligjore. Komuna e Obiliqit është e gatshme për lirimin e qytetarëve nga Tatimi në Pronën e Paluajtshme deri në 100 euro. Dhe rekomandimi i dytë, Ministria e Financave, Punës dhe Transfereve, vendimin për rivlerësimin e pronave ta pezullojë dhe qytetarët e Komunës së Obiliqit, të paguajnë vlerën e faturës së tatimit në pronë për vitin 2023 ashtu siç kanë paguar në vitin 2022”, thuhet në njoftimin e Komunës së Obiliqit. “Kryetari i Komunës së Obiliqit, Xhafer Gashi, është shprehur i gatshëm dhe ka mbështetur faljen e tatimit në pronë, duke pasur parasysh, inflacionin dhe gjendjen e rëndë ekonomike”.
Javën e shkuar, përmes një konference për shtyp dhe në Komisionin Parlamentar për Buxhet, Financa dhe Transfere, ministri Hekuran Murati paraqiti shpjegimin e tij për rritjen e faturave të tatimit në pronë dhe shpalosi propozimin për faljen e 100 euro të tatimit në pronë. Rivlerësimi i pronave i kryer vitin e kaluar nga Ministria e Financave ndikoi që tatimi në pronë të rritet deri në 100 për qind, varësisht nga zonat. Ky proces, që bëhet çdo 3 apo 5 vjet, nxiti reagime te qytetarët, të cilët e kualifikuan rritjen si të papërballueshme. Normat tatimore, bazuar në Ligjin për tatimin në pronë, përcaktohen nga komunat dhe fillojnë nga 0.15 për qind deri në 1 për qind. Ky ligj është në proces të ndryshimit dhe është propozuar që komunat të mos kenë kufizime në përcaktimin e normës tatimore.
© KOHA. Të gjitha të drejtat janë të rezervuara.
