Mungesa e reshjeve shkakton ngordhjen e një numri të madh peshqish në Kamenicë

Mungesa e reshjeve ka shkaktuar ngordhjen e një numri të madh peshqish në lumin Shtrembër, në qytetin e Kamenicë. Në këtë problem ka hasur fotografi i botës së egër, Arian Mavriqi. Pas njoftimit të tij, në vendin e ngjarjes kanë dalë kryetari i Komunës së Kamenicës, Kadri Rahimaj, dhe përfaqësues të shoqatës së peshkatarëve “Mlyshi”, të cilët kanë bërë dislokimin e peshqve në zonat me më shumë ujë

Numër i madh peshqish është gjetur të ngordhur në lumin Shtrembër në qytetin e Kamenicës, për shkak se lumi ka filluar që të thahet pas mungesës së reshjeve të shiut.

Fotografi i botës së egër, Arian Mavriqi, ka hasur në këtë problem gjersa po kryente punën e tij dhe ka lajmëruar menjëherë zyrtarët komunalë.

Në vendin e ngjarjes kanë dalë kryetari i Komunës, Kadri Rahimaj, dhe përfaqësues nga shoqata e peshkatarëve “Mlyshi” në Kamenicë, të cilët kanë filluar dislokimin e peshqve të gjallë në pjesën ku lumi përmbante sasi më të madhe të ujit.

Kadri Rahimaj, kryetar i Komunës së Kamenicës, ka thënë se pas marrjes së informatës, është angazhuar menjëherë për të dalë në vendin e ngjarjes.

“Për shkak të mungesës se ujit që qarkullon në këtë lumë, një sasi e konsiderueshme e peshqve kanë ngordhur. Për ne është një situatë jo e mirë, një situatë që nuk kishim dashur të ndodhte, që të dëmtohet peshku i cili kultivohet dhe rritet në këtë lumë. Me ndihmën e shoqatës së peshkatarëve ‘Mlyshi’ jemi munduar që ta bartin peshkun aktual në një pjesë ku ka më shumë ujë”, ka deklaruar Rahimaj.

Edhe Arbëri 21 sht 2026 Tre peshq mbi 40 kilogramë ngordhin në Badovc, ngrihen dyshime për gjendjen e ujit

Ndërkaq, Fisnik Kastrati, nga shoqata e peshkatarëve “Mlyshi”, e ka vlerësuar si problematik mungesën e të reshurave. Ai ka bërë të ditur se për pasojë, peshqit nuk kanë mundur të zhvendosen në pjesën e lumit ku ka më shumë ujë, duke i çuar drejt ngordhjes.

Lumi Shtrembër është ushqyes për shumë shpendë shtegtarë dhe joshtegtarë, nga lejleku i zi, ai i bardhi, çapka e hirtë, mbreti peshkatar, mëllenja e ujit dhe shumë të tjera.