Qe 15 vjet u janë marrë tokat, pronarët kërkojnë kompensim

Sanie Jusufi

Magjistralja Vushtrri-Skenderaj të dielën është bllokuar për rreth gjysmë ore. Banorët e katër fshatrave të Vushtrrisë, protestuan duke kërkuar nga shteti kompensim për pronat që iu morën për ndërtim të kësaj rruge.

Rruga, sipas tyre, është ndërtuar më 2008, por që përkundër premtimeve për kompensim, një gjë e tillë nuk ka ndodhur ende.

Naim Rrustemi, nga fshati Novolan ka thënë se ka 15 vjet kur ka filluar ndërtimi i rrugës, por ende nuk janë bërë as matjet për kompensim të pronave të tyre.

“Na po i lypim të drejtat tona, kompensimin tonë. Qysh më 2010 kemi bërë kërkesë për shpronësim. Në kohën kur ka filluar rruga, na kanë thënë se për momentin nuk kemi ligj për shpronësim dhe në momentin që bëhet ligji për shpronësim, do t’i bëjmë shpronësimin e tokës dhe pagesat”, ka thënë ai.

Sipas tij, më 2010 e kanë ndalur një pjesë të asfaltimit në Novolan në gjatësi prej 550 metra, deri sa të bëhet shpronësimi, por që tre vjet më parë është asfaltuar edhe ajo pjesë.

“Qysh më 2010 që u jemi drejtuar edhe kryetarit, edhe Qeverisë që të bëhet të paktën matja e tokës që na u ka marrë dhe te dimë se sa tokë është. Por, as kjo s’ka ndodhur”, ka thënë ai.

Banorët thonë se kanë kontaktuar edhe kryetarin e atëhershëm Bajram Mulaku, por që u ka thënë se me këtë merret niveli qendror dhe jo komuna.

Ndërtimi i rrugës, sipas banorit Shaip Kovaçi, ka pamundësuar hyrjen në ara të tyre.

“Çka është më e keqja pesë shpi jemi, është shtru rruga 3 metra nën nivel të arës time, nuk mundem me hy. Duhet të kaloj pesë ara të komshinjve dhe po duhet me ruajtë deri të vijnë ata me korrë grurin, që pastaj me korrë edhe timin”, ka thënë ai.

Banorët tregojnë se kanë ushtruar edhe padi ndaj shtetit për moskompensim, por që ende nuk është bërë asgjë në këtë drejtim.

“Kemi disa padi nëpër gjykata, private. Duam që të kompensohen shpronësimet e trasesë së rrugës regjionale Skenderaj-Vushtrri. Ky ishte vetëm një paralajmërim për Qeverinë, për Ministrinë e Infrastrukturës, të mendojë që ne nuk jemi të interesuar me blloku rrugën, por me tregu që na takon e drejta jonë ligjore”, ka thënë Sherif Xhema, banor i fshatit Dubovc.

Edhe Naser Zymberi tregon për padinë që kishin bërë, por që ende nuk ka ndonjë përgjigje për të.

“Neve kështu në përgjithësi na kanë marrë tokat, na padi nuk kemi... Dikujt i është paguar, pse çfarë e drejte është kjo dikujt me iu pagu, në mexhë jemi, aty iu ka pagu prona e neve nuk na kanë paguar. Matjen nuk e kemi bo kështu të përgjithshme, por afër 40 ari... çfarë e drejte është kjo”, ka thënë ai.

Banorët e fshatrave Novolan, Bruznik, Dubovc dhe Beqiq kanë paralajmëruar se nuk do të ndalen së protestuari deri në përmbushje të kërkesave të tyre.

Banorët e katër fshatrave të Vushtrrisë kanë bllokuar për gjysmë ore magjistralen Vushtrri-Skenderaj, të dielën.

Kjo pasi sipas tyre shteti nuk ka kompensuar pronat të cilat janë marrë për ndërtimin e kësaj rruge.

Sipas tyre, ka 15 vite që nuk po bëhet një gjë e tillë.

Rruga është ndërtuar në 2008, dhe siç kanë thënë, atyre u është premtuar se do të kompensohen pas miratimit të Ligjit për shpronësim.

Por edhe pse Ligji është miratuar në 2010, ato prona nuk janë kompensuar.

Banorët e katër fshatrave kanë vendosur që sot ta bllokojnë magjistralen Vushtrri-Skenderaj, në shenjë proteste për moskompensimin për pronat e tyre, të cilat janë marrë në ndërtim të kësaj rruge.

Sipas këshillit organizativ të katër fshatrave, kjo rrugë ishte ndërtuar në vitin 2008 në prona private dhe asnjëherë nuk janë kompensuar. Ata thonë se tash e sa vite iu kanë drejtuar ministrive por janë anashkaluar.

Protesta e banorëve të fshatrave Novolan, Bruznik, Dubovc dhe Beqiq, do të jetë paqësore dhe do të nis nga ora 11:00, në fshatin Dubovc, në vendin e quajtur te lagjja e “manoveve”.

© KOHA. Të gjitha të drejtat janë të rezervuara.