Vetëvendosje në Podujevë kundër kamerave të sigurisë në rrethrrotullimin e shqiponjës Foto: Ilustrim

Vetëvendosje në Podujevë kundër kamerave të sigurisë në rrethrrotullimin e shqiponjës

Nexhat Tovërlani 06 December 2019 09:00

Podujevë/Prishtinë, 6 dhjetor - Të papranueshme po e konsideron Lëvizja Vetëvendosje caktimin e një pike për vendosjen e kamerës së sigurisë. Në këtë projekt, që ka për qëllim vendosjen e kamerave të sigurisë në qytetin e Podujevës, është paraparë vendosja e një shtylle edhe në rrethrrotullimin ku qëndron përmendorja e shqiponjës (për ndërtimin e së cilës idenë e kishte dhënë këshilltari i VV, Florent Hasani). Kjo po kundërshtohet nga zyrtarët e VV-së. Kryetari i qendrës së kësaj partie në Podujevë, Bajram Ajeti, që është edhe këshilltar komunal, ka thënë se nëse provohet të vendoset një shtyllë e tillë në këtë rrethrrotullim, do të ketë edhe protesta.

“E kemi marrë një informatë se shefi i Urbanizmit ka paraparë që në rrethrrotullimin e shqiponjës afër hotelit ‘Besiana’ të vendoset një shtyllë mu afër saj për kamerat e sigurisë. Ju kisha lutur që të mos vendoset në rrethrrotullimin e shqiponjës. Ju kisha lutur që të mos prekni aty, sepse do të përballeni edhe me protesta. Ka mundësi të vendoset diku tjetër ajo shtyllë dhe jo në rrethrrotullim”, ka thënë Bajram Ajeti gjatë seancës së fundit të Kuvendit Komunal, shkruan sot Koha Ditore.

Sipas tij, kjo po bëhet edhe për inate politike nga zyrtarët komunalë.

Por drejtori i Administratës, Gëzim Namani, ka thënë se pikat se ku të vendosen këto kamera janë caktuar nga Policia e jo nga Komuna.

“Caktimi i vendeve – pikave për vendosjen e kamerave është bërë në bashkëpunim të ngushtë me Policinë e Kosovës (Stacionin Policor në Podujevë). Dhe mund të thuhet se ishte Policia e Kosovës ajo që determinoi në këto dy çështje, ndërsa Komuna ka dhënë kontributin e vet me këshillat në fushën e Teknologjisë Informative dhe jo vetëm”, kishte thënë në muajin maj drejtori i Administratës në Komunën e Podujevës, Gëzim Namani.

(Gjerësisht, sot në “Kohën Ditore”)

 

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme