Zyrtarët opozitarë të Komunës së Podujevës po kërkojnë përgjegjësi nga komunarët për djegien e objektit të çerdhes që nuk u funksionalizua kurrë. Ky objekt, që ishte ndërtuar menjëherë pas luftës në rrugën “Skëndebeu” (në drejtim të fshatit Dumnicë), është përfshirë nga flakët mbrëmjen e së shtunës. Shkaktarët e këtij zjarri që ka dëmtuar kulmin e kësaj çerdheje ende nuk dihen. Këshilltari nga radhët e PDK-së, Rafet Llapashtica, ka thënë se do të kërkojnë raport për këtë çështje në seancën e radhës, shkruan sot Koha Ditore.
“Vazhdimisht Sektori i Arsimit në Komunën e Podujevës është përcjellë me probleme dhe vështirësi, si dhe papërgjegjësi nga ana e drejtuesve të këtij sektori, e sidomos nga ana e drejtorëve në vazhdimsi të Drejtorisë së Arsimit. Djegia e objektit të çerdhes ditën e shtunë pa u futur ende në funksion tregon për mosseriozitetin mbikqyrës të kryerjes së punëve këtu në këtë objekt”, është shprehur Rafet Llapashtica.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoSipas tij, e mira e kësaj është që gjatë kohës së zjarrit nuk ka pasur brenda njerëz.
“Mirë që aty brenda s’ka pasur fëmijë dhe objekti ishte i zbrazët dhe s’ka pasur ndonjë humbje edhe të jetëve të njerëzve. Nuk ka asnjë përgjigje zyrtare rreth rastit nga ana e zyrtarëve komunalë. Ne do të kërkojmë sqarim rreth këtij rasti dhe një raport në seancën e parë të radhës në Kuvend”.
Në anën tjetër, zyrtarët komunalë kanë thënë se në këtë objekt ka pasur zjarrvënie. Për këtë zëdhënësi Nazmi Elezi ka thënë se është duke u marrë Policia.
“Komuna e Podujevës, respektivisht Drejtoria e Arsimit, është informuar se në objektin në ndërtim, i dedikuar për çerdhe, ka pasur zjarrvënie me ç’rast është dëmtuar kulmi i objektit. Me rastin është duke u marrë Policia e Kosovës, e cila është duke zhvilluar hetimet”, ka thënë Elezi. “Përndryshe, çështja e finalizimit të ndërtimit të atij objekti ka mbetur peng i një kontesti gjyqësor në mes operatorit të mëhershëm me AKP-në. Sapo të zgjidhet ky kontest gjyqësor Komuna do të zhvillojë procedurat për vazhdimin e punimeve në ndërtimin e çerdhes në atë lokacion”.
(Artikullin e plotë mund ta lexoni sot në “Koha Ditore”)