Mbi 7 mijë nënshkrime janë mbledhur nga qytetarët e Rahovecit, për ta kundërshtuar versionin aktual të autostradës së Dukagjinit, raporton KTV.
Sipas qytetarëve, me variantin të cilin e ka prezantuar Ministria e Infrastrukturës, po dëmtohet lumi Drini i Bardhë dhe është anashkaluar komuna, pasi që autostrada është 14 kilometra larg nga qyteti i Rahovecit.
Nga e enjtja, edhe banorët e fshatrave të Rahovecit do të mund ta nënshkruajnë peticionin për kundërshtimin e autostradës së Dukagjinit.
Nëse institucionet përgjegjëse nuk reagojnë për ta ndryshuar versionin aktual të autostradës, banorët e komunës së Rahovecit paralajmërojnë edhe protesta.
Ndërkaq, në Ministrinë e Infrastrukturës vazhdojnë të insistojnë se versioni aktual është më i favorshmi për Rahovecin.
Autostrada e Dukagjinit pritet të fillojë të ndërtohet këtë vit dhe lidh qytetin e Istogut, Pejën, Deçanin, Gjakovën, Rahovecin dhe Prizrenin.
Kostoja e kësaj autostrade do të jetë rreth 600 milion euro dhe do të shpronësohen rreth 623 hektarë tokë.
-
Nga: Dorentina Thaqi
-
11 prill 2019 20:38
-
Shpërndaje në: