Radoniqi: Votimi filloi me kohë - s’ka ndryshim në rregullat për qytetarët që s’dinë shkrim-lexim

Kryesuesi i Komisionit Qendror të Zgjedhjeve, Kreshnik Radoniqi, ka votuar qysh në hapje të vendvotimeve, e pas hedhjes së votës ai u ka bërë thirrje qytetarëve që ta ushtrojnë të gjithë të drejtën për të votuar.

Ai po ashtu u ka bërë thirrje këshillave të vendvotimit dhe ekipeve të numërimit, që të respektojnë ligjin dhe rregullat e KQZ-së gjatë procesit.

“Për këtë ditë KQZ-ja ka qenë e angazhuar që nga shpallja e ditës së zgjedhjeve për përgatitjet dhe të gjitha përgatitjet gati kanë përfunduar. Pas kësaj dite fillon edhe numërimi në të gjitha qendrat komunale të numërimit. Në ora 7 ka filluar procesi zgjedhor dhe besoj se në të gjithë territorin ka filluar procesi në orën 7”, ka thënë ai për mediat.

Radoniqi ka thënë se për personat që nuk dinë shkrim-lexim nuk kanë ndryshuar rregullat nga zgjedhjet e kaluara. Vitin e kaluar ka pasur ankesa nga këta qytetarë të cilëve nuk u lejohet asistenca në kutitë e votimit.

“Nuk kemi bërë asgjë ndryshe nga hera e kaluar, personat që nuk dinë shkrim-lexim kanë të drejtë të njoftohen nga familjarët, persona që mund të njoftohen, lidhur me tërë procesin, janë të  lirë të printojnë ndonjë fletëvotim nga interneti, t’i njoftojnë se si të votohet ndërsa prapa kutisë së votimit janë të vetmuar”, theksoi ai.

Ndërkaq, Radoniqi tregoi informacionet e reja për procesin zgjedhor të zhvilluar në konsullata jashtë Kosovës.

Edhe Zgjedhjet 2026 1 muaj më parë 8.29% të votuesve votuan deri në orën 11:00

“Sipas informacioneve në këtë mëngjes, pa 4 qendrat e votimit në Kanadë dhe Amerikë, kanë qenë diku rreth 81% të votuesve me të drejtë vote që kanë votuar”.

E, zëdhënësi i KQZ-së, Valmir Elezi, në konferencën e orës 08:00 konfirmoi po ashtu se procesi zgjedhor "ka nisur në të në të gjitha qendrat e votimit në Republikën e Kosovës".