Shtatë ushqimet më të mira me proteina për personat me diabet

Ushqimi i pasur me proteina mund të ndihmojë në mbajtjen stabile të sheqerit në gjak dhe t'ju mbajë të ngopur për më gjatë.

Sipas EatingWell, nëse keni diabet dhe ndiheni të uritur gjatë ditës, është në rregull të hani mes vakteve.

Mbi 40 milionë amerikanë jetojnë me diabet, rreth 1 në 8 persona. Shumica (90-95 për qind) kanë diabet të tipit 2. Ushqimi që konsumoni, përfshirë mes-shujtat, luan rol të rëndësishëm në kontrollin e nivelit të sheqerit në gjak.

Mes-shujtat apo "snacks" që përmbajnë proteina, yndyra të shëndetshme dhe pak karbohidrate mund të ndihmojnë të shmangni rritjet e shpejta të sheqerit.

1. Djathi

Djathi është i shijshëm, ngopës dhe ka pak karbohidrate. Një porcion (rreth 28 gram) djathë Cheddar përmban 7 g proteina dhe 9 g yndyrë.

Disa studime tregojnë se konsumimi i djathit lidhet me rrezik më të ulët për diabet të tipit 2. Proteinat ndihmojnë në kontrollin e urisë dhe ngadalësojnë rritjen e sheqerit në gjak.

Kujdes: nëse keni probleme me veshkat, duhet të kontrolloni sasinë e proteinave.

2. Arrat e përziera

Arrat janë zgjedhje shumë e mirë: kanë pak karbohidrate dhe janë të pasura me yndyra të shëndetshme, proteina, fibra dhe minerale.

Ato përmbajnë edhe magnez dhe antioksidantë që mund të ndihmojnë në rregullimin e sheqerit në gjak. Bajamet, arrat, fëstëkët, lajthitë dhe kikirikët janë zgjedhje të mira. Për shembull, bajamet japin rreth 6 g proteina për porcion.

Ani pse kanë yndyrë, nuk lidhen me shtim në peshë nëse konsumohen me masë. Madje mund të ndihmojnë në shëndetin e zemrës dhe zorrëve.

Zgjidhni variante pa kripë dhe pa sheqer të shtuar.

3. Perime me gjalpë arroresh

Nëse nuk preferoni arrat e plota, mund t’i kombinoni me perime si selino, karrota ose mollë.

Një lugë gjalpë kikiriku përmban rreth 4 g proteina. Fibra nga perimet ndihmon në ngadalësimin e tretjes dhe stabilizimin e sheqerit në gjak.

4. Farat e lulediellit

Farat e lulediellit janë të pasura me proteina, yndyrë dhe fibra. Një porcion përmban rreth 3 g proteina dhe 2 g fibra.

Ato mund të ndihmojnë në uljen e sheqerit në gjak te personat me diabet të tipit 2. Antioksidantët që përmbajnë mund të kenë efekt pozitiv, por nevojiten më shumë studime.

5. Edamame (fasule soje të reja)

Edamame është "snack" shumë ushqyes me bazë bimore. Një filxhan përmban rreth 18 g proteina dhe 8 g fibra.

Është i lehtë për t’u përgatitur (i ngrirë dhe gati në pak minuta). Gjithashtu ndihmon në mbajtjen e tensionit të gjakut në nivele të shëndetshme, gjë e rëndësishme sepse diabeti rrit rrezikun për sëmundje të zemrës.

6. Vezë të ziera

Vezët janë një "snack" shumë i mirë mes vakteve. Një vezë ka rreth 6 g proteina dhe shumë pak karbohidrate.

Një studim ka treguar se ngrënia e një veze para gjumit mund të ndihmojë në uljen e sheqerit në mëngjes dhe përmirësimin e ndjeshmërisë ndaj insulinës.

Mund t’i kombinoni me bukë integrale ose perime për më shumë fibra.

7. Kos i trashë

Nëse keni dëshirë për diçka të ëmbël, kosi i trashë është zgjedhje shumë e mirë. Një porcion përmban rreth 20 g proteina dhe vetëm 8 g karbohidrate.

Mund ta kombinoni me fruta me indeks të ulët glicemik dhe arra. "Snacks" me deri në 15 g karbohidrate për porcion mund të ndihmojnë në kontrollin e sheqerit në gjak, por kjo ndryshon nga personi në person.

Këshilla të tjera për të kontrolluar sheqerin në gjak

Metoda e pjatës:
Mbushni gjysmën e pjatës me perime, një të katërtën me proteina dhe pjesën tjetër me karbohidrate.

Qëndroni aktiv:
Aktiviteti fizik ndihmon në stabilizimin e sheqerit në gjak dhe përmirëson ndjeshmërinë ndaj insulinës. Rekomandohen të paktën 150 minuta aktivitet në javë.

Mbani peshë të shëndetshme:
Ulja e yndyrës në zonën e barkut dhe një stil jetese i shëndetshëm ndihmojnë në uljen e rrezikut për komplikime.

Përfundimi i ekspertit

Nevoja për "snacks" mes vakteve varet nga shumë faktorë: niveli i sheqerit, trajtimi, uria dhe gjendja shëndetësore.

Gjetja e një balanci që i përshtatet stilit tuaj të jetesës është çelësi për menaxhimin e diabetit.