“Ephemeral Echos” me qetësinë e vrazhdë

Qetësia është gjë e dukshme në veprat e Ermir Zhinipotokut. Vetë ngjyrat e imponojnë atë. Por e zhurmshmja aty është edhe më e fortë. Fshihet midis spiraleve, imazheve të maceve a ndonjë subjekti tjetër. Ekspozita “Ephemeral Echos” (Jehonat kalimtare) e Zhinipotokut e hapur në galerinë “Lambdalambdalambda” në kryeqytet fut publikun në një rreth vicioz, ku ashpërsia e qetësisë bën lojën e vet. Veprat janë për subjekte kanë fraktura poetike, që krejt bashkë sikur bëjnë thirrje për një transformim.

“Ne kemi parë veprat e Ermirit para tre vjetësh në një ekspozitë grupore, ku ishin edhe veprat e brilant Milazimit, Blerta Hasanit dhe disa të tjerëve. Pastaj kjo ekspozitë ka ardhur me sugjerimin e Brilant Milazimit, i cili edhe ka kuruar këtë ekspozitë dhe jemi të lumtur që ta nisim vitin me ekspozitën personale të Ermirit”, deklaroi Katharina Schendl.

Vetë artisti nuk ka pëlqyer t’i komentojë veprat e tij e kështu ka vepruar edhe kuratori. Kanë dashur të jenë të qetë sikurse edhe ndjesia që jep ekspozita.

“Është interesante se si ai flet për tranzicionin e kafshëve në qenie humane dhe për rrethin jetësor midis zogjve e qetësisë që na rrethojnë dhe pikturat kanë qetësi, por janë shumë të forta dhe nëse i shikon më gjatë mund të gjesh shumë gjëra të tjera”.

Brenda hapësirës së vogël të galerisë, që zë vend në qendër të Prishtinës deri në javën e parë të marsit, publiku mund të futet në botën e qetësisë së ngjyrave. Atyre që Ermir Zhinipotoku i ka kombinuar viteve të fundit. Shquhet si një prej piktorëve të gjeneratës së re. Kurse me “Ephemeral Echos” sikur i ka dhënë vulë stilit të tij.