-
Nga:
Vlerë Mehmeti
- 19 qershor 2026 19:40
- Shpërndaje në:
Saktësisht 1 mijë e 432 njësi të infuzionit 500-mililitërsh janë bllokuar për përdorim në Spitalin e Mitrovicës, pas dyshimit se një nga to nuk ishte brenda specifikave të përcaktuara për produktin.
Siç ka mësuar KOHA, bëhet fjalë për grimca apo mbetje të vërejtura në një shishe infuzioni, ndërsa rasti është evidentuar në repartin e Kirurgjisë së këtij spitali.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoShërbimi Spitalor Klinik e Universitar (SHSKUK), nën ombrellën e të cilit funksionon spitali, bën kontraktimin e produkteve dhe më pas furnizimin e spitaleve të përgjithshme. Në këtë institucion kanë njoftuar përmes një komunikate se rasti është raportuar nga farmacistja përgjegjëse e barnatores.
“Më 17.06.2026, Inspektorati Farmaceutik ka kryer inspektim në barnatoren e spitalit, ku është verifikuar gjendja e raportuar për produktin në fjalë. Përmes procesverbalit, Inspektorati Farmaceutik ka urdhëruar bllokimin e 1,432 njësive të produktit medicinal Compound Sodium Lactate Intravenous Infusion BP 500 ml deri në përfundimin e analizave laboratorike dhe procedurave përkatëse vlerësuese”, thuhet në njoftimin e SHSKUK-së.
Por, ky institucion nuk ka sqaruar se për çfarë lloj mbetjesh bëhet fjalë, duke thënë se kjo do të përcaktohet nga analizat.
“Natyra e gjetjes do të përcaktohet pas përfundimit të analizave laboratorike dhe vlerësimeve profesionale nga institucionet kompetente, dhe do të ju njoftojmë për rezultatet përkatëse pas përfundimit të këtyre procedurave”, thuhet në njoftim.
Distributori i këtij produkti në Kosovë është DreniPharm, por në këtë kompani nuk pranuan të prononcohen zyrtarisht deri në publikimin e rezultateve të analizave.
Në SHSKUK nuk u përgjigjën në pyetjet se kur është bërë furnizimi i spitaleve me këtë produkt, në sa pacientë është përdorur ai dhe nëse ndalimi për përdorim është lëshuar edhe për spitale të tjera.
Përgjigje nuk dhanë as në Agjencinë e Kosovës për Produkte dhe Pajisje Medicinale nëse produkti i kishte kaluar të gjitha procedurat e kontrollit dhe verifikimit para se të autorizohej importi dhe përdorimi i tij në institucionet shëndetësore publike.