-
Përktheu:
Flutura Gashi-Mehmeti
- 21 shtator 2025 11:25
- Shpërndaje në:
Të paktën 34 persona janë vrarë natën e së shtunës në qytetin e Gazës, përfshirë fëmijë, kanë bërë të ditur të dielën zyrtarët e shëndetësisë, teksa Izraeli vazhdon me ofensivën e tij në qytetin e goditur nga uria dhe në kohën kur disa vende përgatiten të njohin një shtet palestinez.
Zyrtarët e shëndetësisë në Spitalin Shifa, ku janë dërguar shumica e trupave, kanë thënë se të vdekurit përfshinin 14 persona të vrarë në një sulm të vonë të shtunën, nga i cili është goditur një bllok banimi në anën jugore të qytetit.
Stafi i shëndetësisë ka thënë se një infermier që punonte në spital ishte midis të vdekurve, së bashku me gruan dhe tre fëmijët e tij.
Operacioni i fundit izraelit, i cili filloi këtë javë, përshkallëzon më tej një konflikt që ka trazuar Lindjen e Mesme dhe ka të ngjarë ta shtyjë çdo armëpushim edhe më tej jashtë mundësive.
Ushtria izraelite, e cila thotë se dëshiron të "shkatërrojë infrastrukturën ushtarake të Hamasit" dhe u ka kërkuar palestinezëve të largohen, nuk ka dhënë një afat kohor për ofensivën, por ka indikacione se mund të duhen muaj.
Sulmet e së shtunës në mbrëmje vijnë ndërsa disa vende të shquara perëndimore përgatiten të njohin shtetësinë palestineze në mbledhjen e liderëve botërorë në Asamblenë e Përgjithshme të Kombeve të Bashkuara të hënën.
Ato përfshijnë Mbretërinë e Bashkuar, Francën, Kanadanë, Australinë, Maltën, Belgjikën dhe Luksemburgun. Mbretëria e Bashkuar dhe Portugalia kanë paralajmëruar se do ta njohin shtetin palestinez të dielën.
Përpara seancës së OKB-së, aktivistët e paqes në Izrael kanë përshëndetur njohjen e planifikuar të një shteti palestinez. Të dielën, një grup prej më shumë se 60 organizatash hebraike dhe arabe për paqe dhe pajtim, të njohura si Koalicioni "Është Koha", bënë thirrje për t'i dhënë fund luftës, lirimin e pengjeve dhe njohjen e një shteti palestinez.
Megjithatë, një armëpushim mbetet i pakapshëm. Bombardimet izraelite gjatë 23 muajve të fundit kanë vrarë më shumë se 65,000 njerëz në Gaza, kanë shkatërruar zona të gjera të rripit, kanë zhvendosur rreth 90% të popullsisë dhe kanë shkaktuar një krizë katastrofike humanitare, teksa ekspertët thonë se Qyteti i Gazës po përjeton zi buke.