Lamine Yamal fitoi betejën e pretendentë për “Topin e Artë”, duke i shënuar dy gola të enjten. Falë kontributit të tij, Spanja fitoi 5:4 ndaj Francës në gjysmëfinale të Ligës së Kombeve të UEFA-s.
17-vjeçari Yamali la në hije francezët Desire Doue dhe Ousmane Dembele, që e udhëhoqën PSG-në drejt triumfit në Ligën e Kampionëve. Ata dhe të tjerët te Franca janë dukur të lodhur në gjysmëfinalen e së enjtes, ndërsa Spanja siguroi finalen e së dielës me Portugalinë.
Portugalia fitoi 2:1 ndaj Gjermanisë, të mërkurën.
Gjysmëfinalja e dytë ishte edhe përballje e yjeve të rinj, por ishte e qartë se finalja e së shtunës së kaluar në Munih ka rënduar këmbët e yjeve të PSG-së. Parisi e fitoi 5:0 finalen e Championsit ndaj Interit. Në atë ndeshje shkëlqyen Doue e Dembele, por jo edhe në ndeshjen e Francës ndaj Spanjës.
Gjysmëfinlja ishte ndeshja me më së shumti gola në historinë e shkurtër të Ligës së Kombeve. Tre prej golave të Francës u shënuan pasi Yamal realizoi për 5:1 dhe lojtarët e Spanjës u ndalën duke vlerësuar se ndeshja ishte fituar.
Edhe
Yamali dhe Mbappe përballen në “klasike”, një ditë para “Topit të Artë”
“Ishte ndeshje e shkëlqyer. Në fund ishte rezultat i përafërt, por kemi luajtur shumë mirë dhe mendoj se e kemi merituar fitoren”, ka thënë Yamal.
Të dielën, prej orës 15:00, në Stuttgart është ndeshja për vend të tretë mes Gjermanisë dhe Francës.
Nga ora 21:00 në Munih është finalja Portugali – Spanjë. Do të jetë edhe përballja Cristano Ronaldo – Yamal.
“Të luaj kundër Cristianos? Ai është legjendë e futbollit. Do të bëj punën time, që është të fitoj ndeshjen dhe kjo është e tëra”, ka thënë Yamal që po vazhdon shkëlqimin dhe po rrit gjasat për ta fituar “Topin e Artë”.
“Nëse duan ta japin ‘Topin e Artë’ në bazë të kësaj loje, në rregull. Unë isha i gatshëm. ‘Topi i artë’ është për lojtarin më të mirë të vitit dhe unë nuk kam pasur probleme që të luaj për këtë sonte. Shumë e thjeshtë”, ka shtuar superylli i ri i futbollit.
Ky është edicioni i katërt i Ligës së Kombeve, garë e prezantuar për të zëvendësuar miqësoret, por që po fiton në rëndësi. Portugalia në vitin 2019, Franca në vitin 2021 dhe Spanja në vitin 2023 janë fituesit e deritashëm. Liga e Kombeve është e ndarë në katër nivele dhe vetëm më të mirët në Ligën A, që është niveli më i lartë, luftojnë për titull të kampionit.
“Topi i Artë”, që vlerësohet trofeu kryesor individual në futboll, do të ndahet në shtator. Selektori i Spanjës, Luis de la Fuente, ka thënë se me paraqitjen ndaj Francës, Yamali ka rritur dukshëm gjasat.
“Ishte një paraqitje që dëshmon se Yamali duhet ta fitojë ‘Topin e Artë’”, ka thënë De la Fuente.
Edhe
“E meritoj” – Yamali e sheh vetëm një rival për Topin e Artë
“Ai është lojtari më i mirë në botë dhe sipas vlerësimit tim e meriton atë”, ka shtuar selektori spanjoll.
Ceremonia e “Topit të Artë” mbahet më 22 shtator. Do të vendosë shumë edhe Botërori i klubeve që fillon më vonë këtë muaj, por tashmë kandidatët kryesorë vlerësohen Dembele dhe Yamali. Dembele pos Championsit ka fituar edhe Ligën e Francës dhe Kupën franceze.
