Studentë nga Kosova falënderojnë FSHF-në dhe Dukën

Federata Shqiptare e Futbollit të hënën publikoi njoftimin për një letër falënderimi që ka pranuar nga “një grup studentësh me aftësi të kufizuara nga Kosova ‘Handicap Students of Kosovo’, pas ndeshjes Shqipëri – Serbi”.

Së fundi FSHF-ja dhe presidenti i saj, Armand Duka, janë kritikuar ashpër nga tifozët e shumtë shqiptarë për organizmiin e Evropianit U21 të vitit 2027 bashkë me Serbinë dhe për mënyrën se si kanë ndarë biletat për ndeshjen e së shtunës mbrëma me Serbinë.

“Këta studentë ishin pjesë e një grupi të gjerë përfaqësuesish nga Shoqata e të Verbërve, Shoqata e Invalidëve, si dhe individë me aftësi të kufizuara nga brenda dhe jashtë Shqipërisë, të gjithë me origjinë shqiptare, të cilëve FSHF-ja u ofroi mundësinë për të ndjekur ndeshjen Shqipëri – Serbi. Në letrën e tyre, studentët nga Kosova shprehin mirënjohjen ndaj Presidentit të FSHF-së, Armand Duka, dhe të gjithë stafit organizativ, për mikpritjen, përkujdesjen dhe trajtimin dinjitoz që iu është ofruar gjatë gjithë qëndrimit të tyre në Tiranë”, shkruan në njoftimin e FSHF-së.

FSHF-ja ka publikuar po ashtu përmbajen e plotë të letrës së këtij grupimi studentësh.