Titullar nga fillimi i sezonit, deri në fund. 38 paraqitje nga 38 sa i ka i gjithë sezoni.
Vetëm një herë i zëvendësuar. Një gol që pati vlerën e tri pikëve në fushën e Genoas. Një asistim në ndeshjen e parë të drejtpërdrejtë me Interin që u mbyll 1:1. Mbi të gjitha, ai ishte lider i mbrojtjes së Napolit.
“Pas këtij sezoni, Amir Rrahmani nuk do të kujtohet më si dora e djathtë e Kalidou Koulibalyt apo Kim-Min Jaes. Kësaj radhe, ai ishte lider i mbrojtjes”, ka shkruar “Tuttomercatoweb” në shkrimin që ia ka kushtuar kapitenit të Kosovës të shtunën.
31-vjeçari nuk hasi në vështirësi me këdo që luajti në mbrojtje.
Telashe me lëndime kishin Alessandro Buongiorno e Juan Jesus. Por ai ishte stabil në mbrojtje edhe me Rafa Marinin e Mati Oliveran.
Edhe
Rrahmani, shtylla e mbrojtjes më të mirë në Evropë
“Kush do ta thoshte këtë kur ai u transferua pesë vjet më parë në mesin e mijëra dyshimeve”, ka pyetur gazeta e njohur italiane.
Pas vetëm një sezoni në Hellas Verona, u largua nga skuadra ku mbrojtësi më i mirë vlerësohej të ishte Marash Kumbulla. Fillimisht pas transferimit, ai ishte prapa Kostas Manolasit dhe Koulibalyt. Më pas ishte përkrah senegalezit në qendër të mbrojtjes, e më pas ishte ndihmës i Kimit.
Viti i kaluar mund të cilësohet si më i vështiri për Rrahmanin. Por edicioni i sivjetmë, më i miri.
Krahasuar me dy vjet më parë, qendërmbrojtësi kosovar kishte rol krejtësisht ndryshe.
“Amiri është ushtar, robot. Ai është si kompjuter. Më ka befasuar sepse është punëtor i madh. Duhet t’i tregoni diçka, më pas ai e mban mend dhe e aplikon menjëherë”, kishte thënë Conte për Rrahmanin pak kohë më parë.
“Këto fjalë e shpjegojnë rritjen e një futbollisti që asnjëherë nuk ka qenë në plan të parë. Futbollisti i cili duhej djersitur deri në pikën e fundit për lavdinë që tani e ka arritur. Pa qenë nën hije apo në rol të përkrahësit”, ka mbyllur shkrimin “Tuttomercatoweb”.
Rrahmani përveç në ndeshjen ndaj Interit, asistim pati edhe ndaj Bolognas.
Edhe
Rrahmani shfaqet me flamur të Kosovës në urimin për Napolin
Por ai i së premtes mbrëma në fitoren 2:0 ndaj Cagliarit në golin që e shënoi Romelu Lukaku dhe që e vendosi sfidën, ishte më i vlefshmi. Ishte asistim për titull kampioni në Serie A.
Amir Rrahmani tani ka dy tituj në Serie A brenda tre vjetësh. Në Serie A ka bërë përvojë të madhe, pasi ka zhvilluar 182 ndeshje në total, me 11 gola e gjashtë asistime. Ai vlerësohet shumë i rëndësishëm edhe te Kosova. Kapiteni 31-vjeçar i “Dardanëve” ka zhvilluar 60 ndeshje, ndërsa ka kontribuuar me shtatë gola.
