Berat Gjimshiti nga Zurichu, prej kohësh është bërë figurë e rëndësishme në Bergamo. Për mediumin zviceran “Blick” ai ka folur për lidhjen e veçantë me Atalantan, ndryshimin e trajnerit dhe dhembjen që mungon në Kupën e Botës me Shqipërinë
Pavarësisht se e siguroi kualifikimin në Evropë me Atalantan, Berat Gjimshiti ka mbetur me një ndjenjë zhgënjimi. Ai donte që ta vazhdonte sezonin – me paraqitjen në Kupën e Botës me Shqipërinë dhe të ishte kapiten i saj. “Kualifikimi në Kupën e Botës ishte mundësi e veçantë, ndoshta e fundit për mua. Kjo më dhemb jashtëzakonisht shumë – sidomos për shkak të mënyrës se si shkoi plejofi ndaj Polonisë”, ka deklaruar Gjimshiti të premten në një intervistë për mediumin zviceran “Blick”.
Por, mbrojtësi i qendrës shikon para.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Qëllimi është të kualifikohemi në një tjetër Kampionat Evropian me Shqipërinë. Më pas shpresoj të jem në gjendje të mirë fizike, për aq kohë sa është e mundur, dhe të jem në gjendje të luajë në nivelet më të larta. Dhe natyrisht, ta nisim sezonin më mirë se ky që e përfunduam”.
Gjimshiti me Shqipërinë në Varshavë e humbën 2:1 ndeshjen gjysmëfinale të plejofit për Kupën e Botës.
33-vjeçari u lind në Zurich. Por, për çdo vjet që ka kaluar ai është bërë gjithnjë e më tepër banor i Bergamos në Itali. Të dielën, qendërmbrojtësi e kompletoi sezonin e dhjetë në Itali.
“Kur erdha në Bergamo në vitin 2016, asnjëherë nuk e kam imagjinuar se do të luaja kaq shumë ndeshje për këtë klub”.
Gjimshiti tani i ka 334 paraqitje në ndeshje zyrtare për Atalantan. Vetëm tre futbollistë në historinë e klubit – dy prej të cilëve ende janë aktivë – kanë luajtur më shumë ndeshje. Ai është nderuar së fundmi për këtë të arritur.
“Kjo më bën shumë krenar. Lidhja me qytetin dhe tifozët është shumë e veçantë”.
Nuk e mendon kthimin te Zvicra për momentin
Bergamo prej kohësh është bërë shtëpia e dytë për Gjimshitin dhe familjen e tij. Gruaja e tij, Alisa, hapi dyqan me markën e saj të modës “Jalize”, ndërsa fëmijët e tyre shkojnë në shkollë në atë qytet. Ai planifikon ta vazhdojë rrugëtimin sportiv në Bergamo.
Zyrtarisht, kontrata e Gjimshitit skadon në fund të qershorit. Megjithatë, “Blick” ka mësuar se shpejt do të zyrtarizohet vazhdimi i kontratës. Rikthimi në Superligë të Zvicrës apo te Zurichu nuk është në plan për momentin.
“Jo për momentin. Ndihem mirë fizikisht dhe dua të vazhdoj të luaj në nivelet më të larta. Por, në futboll asnjëherë nuk mund ta mbyllësh derën”.
Lidhja e veçantë me Gasperinin
Gjimshiti e di se sa shpejt gjërat ndryshojnë në futboll. Ai e nisi me vështirësi periudhën tek Atalanta. Pas huazimeve tek Avellino dhe Benevento, në atë kohë trajneri 68-vjeçar, Gian Piero Gasperini, e ktheu në Bergamo, pasi qendërmbrojtësi lëndoi ligamentin e gjurit.
“Ai më tha: ‘Mund të qëndrosh nëse dëshiron. Nëse jo, mund të largohesh’. Në të njëjtën kohë ai na e bëri me dije se ata që stërviten më së miri, mund të luajnë. Dhe ky ishte momenti i kthesës”.
Pas tetë vjetësh nën udhëheqjen e Gasperinit, bashkëpunimi i suksesshëm mori fund verën e kaluar. Fillimi i sezonit të ri ishte më i ngadaltë.
“Pas një kohe kaq të gjatë me trajnerin e njëjtë, ndryshimi ishte shumë i vështirë. Nën Gasperinin, e dinim rutinën brenda dhe jashtë”.
Ekipi u stabilizua vetëm pas zëvendësimit të Ivan Juriqit me Raffaele Palladinon.
Me të në krye, Atalanta e siguroi kualifikimin në Ligën e Konferencës. Megjithatë, koha e Palladinos në Bergamo tashmë ka përfunduar. Pas sezonit u ndanë rrugët dhe Maurizio Sarri pritet të jetë pasues i tij.