Sulmuesi Troy Parrott me “hat-trick” ia ka siguruar Irlandës pozitën e dytë, përkatësisht të plejofit të Botërorit 2026.
Parrot shkëlqeu në ndeshjen dramatike ndaj Hungarisë, në fitoren 3:2.
Hungaria ishte fare pranë sigurimit të vendit të dytë në Grupin F kur rezultati ishte 2:2. Kishte një pikë më shumë me atë rezultat.
Por sulmuesi i AZ Alkmaarit, Parrott, realizoi gol në minutën e 96-të, për ta ngjitur Irlandën në pozitën që dërgon në plejof.
Ndeshja e fundit e grupit u zhvillua të dielën mbrëma në “Pushkash Arena”.
Edhe
Irlanda fiton ndaj Portugalisë, shpreson në plejof
Irlanda tani do ta ketë mundësinë në marsin e vitit të ardhshëm që të avancojë në Botërorin 2026, që organizohet në Kanada, Meksikë dhe SHBA.
Në vendin e dytë, Irlanda ka 10 pikë pas gjashtë ndeshjeve. Grupin e ka fituar Portugalia me 13 pikë dhe avancon direkt në Botëror.
Hungaria e përfundon ciklin e rregullt kualifikues të Botërorit në vendin e tretë me tetë pikë, pesë më shumë se Armenia që është e fundit.
Daniel Lukacs shënoi për 1:0 në minutën e tretë, ndërsa Parrott barazoi shifrat në minutën e 15-të.
Edhe
Hungaria prish në fund festën e Ronaldos dhe Portugalisë
Barnabas Varga më pas ktheu epërsinë e hungarezëve me golin e minutës së 37-të për 2:1.
Në minutën e 80-të dhe të gjashtë të kohës shtesë, Parrott shënoi edhe dy gola tjerë për rezultatin përfundimtar dhe fitoren e jashtëzakonshme.
