Arbnor Muja u inkuadrua në lojë në minutën e 60-të te Samsunspori dhe e shënoi golin e fitores 2:1 në shtëpi ndaj Kayserisporit.
Me fitoren e arritur të dielën në ndeshjen e fundit të Superligës së Turqisë për këtë edicion, Samsunspori e siguron paraqitjen në Ligën e Evropës nga vendi i tretë me 64 pikë. Dy pikë më pak i ka Beshiktashi që fitoi po ashtu të dielën 4:0 në udhëtim te Bodrumspori.
Muja golin e fitores 2:1 e realizoi në minutën e tetë të kohës shtesë. Goli i barazimit 1:1 u shënua në minutën e 95-të.
26-vjeçari Muja e mbyll kampionatin me tri gola e dy asistime në 35 ndeshje të luajtura.
Bodrumspori, kundërshtari i Beshiktashit të dielën, largohet nga liga me 37 pikë. Edhe në rast të fitores nuk ka mundur t’i shpëtonte rënies.
Ernest Muçi luajti te Beshiktashi deri në minutën e 72-të, ndërsa Milot Rashica ishte i lënduar.
Te Bodrumspori në tërë ndeshjen luajtën Arlind Ajeti dhe Taulant Seferi.
