Kosova është njëra prej tetë përfaqësueseve që paraqiten në finalet e plejofit evropian për kualifikim në Kupën e Botës në futboll.
Në finale, Kosova luan me Turqinë, të martën mbrëma në “Fadil Vokrri”.
Mediume të mëdha ndërkombëtare kanë shkruar për ndeshjen.
“Kosova e vogël kërkon historinë e Kupës së Botës me ndeshjen e fundit kualifikuese kundër Turqisë”, ka shkruar agjencia e lajmeve Reuters.
Kjo agjenci ka bërë një prezantim të rritjes graduale të ekipit të Kosovës dhe arritjen në finale të plejofit. Shkrimi i Reutersit është përcjellë në mediume të shumta nëpër botë.
“The Guardian” ka shkruar se “çdo gjë është e mundshme për Kosovën”.
Ndërkohë titulli i një komenti të Alex Torres për mediumin spanjoll “AS”, është: “Ndeshja që Fadil Vokrri është dashur ta shikonte”.
Sipas autorit, asgjë që Kosova ka arritur nuk do të ishte e mundur pa ish-presidentin e federatës, legjendën Vokrri. Torres ka shkruar për përvojën personale që kishte me Vokrrin e ndjerë, për planet dhe synimet e tij.
“Nesër Kosova përballet me Turqinë duke e ditur që fitorja ia siguron vendin në Kupën e Botës. Do të luajë në stadiumin që e mban emrin e Fadil Vokrrit. Është e trishtueshme dhe e padrejtë që ai nuk do të jetë aty për ta parë, por kujtimi i tij do të jetë i gjallë në mendjen e spektatorëve. Asgjë nuk do të ishte e mundur pa të”, shkruan në artikullin e “AS”.
Edhe
Bota shkruan për historinë që mund ta shkruajë Kosova
Revista gjermane “Kicker” ka shkruar ndër të tjera për bonusin që është premtuar nga Qeveria e Kosovës në rast të kualifikimit në Botëror. 1 milion janë premtuar për fitore në finale, por “edhe më shumë”.
Ndërkohë mediumet e fuqishme turke kanë dërguar ekipet e gazetarëve në Kosovë. Ato po e përcjellin në çdo hap përfaqësuesen turke, por edhe Kosovën.
Ndeshja pritet me shumë interesim edhe në Turqi, por edhe në shumë vende të tjera.
