LIVE: Slloveni – Kosovë

Sllovenët “i frikësohen” numrit të madh të tifozëve të Kosovës

Një numër shumë i madh i tifozëve të Kosovës janë të pranishëm në stadiumin “Stozhice” në Lubjanë të Sllovenisë. 

Kjo konfirmohet edhe nga videot e publikuara nga mediumi “Ekipa.svet.24.si” i Sllovenisë. 

Ky medium i ka përshkruar skenat pranë stadiumit si “shqetësuese” për tifozët dhe përfaqësuesen e Sllovenisë. 

“Ishte e qartë edhe në rrugë se një numër i madh i tifozëve ishin duke ardhur. Nga Sllovenia, Austria, Gjermania, Italia dhe vende të tjera. Do të jetë interesant të shihet nëse do të ketë trazira përreth stadiumit Stozhice, sepse ata do të lejohen të hyjnë me simbole shtetërore dhe të Shqipërisë vetëm në disa pjesë të caktuara të stadiumit, dhe jo aty ku janë tifozët e Sllovenisë. Ato që mund të shihni, pranë stadiumit, janë impresionuese por edhe shqetësuese për tifozët. Tifozët e Sllovenisë mund të jenë në nivel të lartë, por të zhurmshëm do të jenë edhe ata të Kosovës”, ka shkruar ndër të tjera mediumi slloven. 

Ndeshja mes Sllovenisë dhe Kosovës nis në orën 20:45.

Sllovenia me pesë mbrojtës në formacionin titullar

Përfaqësuesja e Sllovenisë do të ketë pesë mbrojtës në formacionin titullar në duelin ndaj Kosovës. 

Në mungesë të Benjamin Sheshkos, Andrazh Sporar kthehet në formacionin titullar, njësoj si dyshja e Sturm Grazit, Tomi Horvat dhe Jon Gorenc Stankoviq. 

Sllovenia do të jetë nikoqire e Kosovës në stadiumin “Stozhice” në Lubjanë dhe e synon fitoren e parë në kualifikime. 

Barazimi i konvenon Kosovës. Kosovës do t’i mjaftonte një pikë për ta siguruar vendin e dytë në grup, përkatësisht plejofin e Botërorit 2026.

Formacioni i Sllovenisë: 

Oblak, Karniçnik, Brekalo, Bijol, Drkushiq, Janzha, Stankoviq, Horvat, Elshnik, Vipotnik, Shporar.

Publikohet formacioni i Kosovës për ndeshjen vendimtare

Selektori i Përfaqësueses së Kosovës, Franco Foda, ka publikuar formacionin startues për ndeshjen ndaj Sllovenisë.

“Dardanët” nga ora 20:45 luajnë përballë Sllovenisë në Lubjanë, në ndeshjen e parafundit kualifikuese për Botërorin 2026. 

Ka ndryshime te Kosova. Në portë, në vend të të suspenduarit dhe portierit të parë, Arijanet Muriq, do të jetë Amir Shaipi, portieri i Luganos. 

Në qendër të mbrojtjes janë kthyer Amir Rrahmani dhe Lumbardh Dellova, që munguan për shkak të lëndimeve në ndeshjet e kaluara. Rrahmani e Dellova zëvendësojnë në mbrojtje Kreshnik Hajrizin dhe Ilir Krasniqin. 

Ndërkohë, në duelin ndaj Suedisë nuk luajti Elvis Rexhbeçaj në mesfushë shkaku i lëndimit në fushë, ndërsa atë e kishte zëvendësuar Veldin Hoxha. Edhe Rexhbeçaj kthehet në rolin e mesfushorit defensiv. 

Pjesa tjetër e skuadrës mbetet e njëjta siç ka qenë në duelet e kaluara.

Selektori Foda ka vendosur që t’i përmbahet sistemit 5-3-2. 

Sulmit i prijnë Vedat Muriqi dhe Fisnik Asllani. 

Mesfusha përbëhet prej Leon Avdullahut, Elvis Rexhbeçajt dhe Florent Muslijës.  

Në repartin defensiv janë Albian Hajdari, Amir Rrahmani, Lumbardh Dellova, Dion Gallapeni dhe Mërgim Vojvoda.  

Në portë është Amir Shaipi.