LIVE: Ndeshjet e sotme të Superligës

Prishtina e Re barazon rezultatin ndaj Llapit

Prishtina e Re e ka barazuar rezultatin në duelin ndaj Llapit.

Ibrahim Kargbo e shënoi golin e barazimit në minutën e 75-të.

Gjilani sërish në epërsi ndaj Malishevës

Gjilani ka kaluar sërish në epërsi ndaj Malishevës.

Golin për 2:1 nga penalltia e shënoi sulmuesi Senad Jaroviq, në minutën e 70-të.

Për të ishte goli i dhjetë i sezonit.

Penalltia u fitua pas rishikimit të situatës në VAR, pasi në zonë sipas gjyqtarit Lirim Jashari, Robert Rrahmani u ndal në mënyrë të palejuar.

Dukagjini shënon ndaj Ferizajt

Në epërsi 1:0 në pjesën e parë ka kaluar edhe skuadra e Dukagjinit ndaj Ferizajt.

Golin për skuadrën klinase e shënoi Hekuran Berisha në minutën e parë shtesë të pjsës së parë. Ndeshja i takon xhiros së 22-të të Superligës së Kosovës në futboll.

Pjesa e parë ka përfunduar edhe në ndeshjen Gjilani 1:1 Malisheva dhe Prishtina e Re 0:1 Llapi.

Barazohet rezultati në Gjilan

Rezultati në ndeshjen Gjilani – Malisheva, është barazuar.

Në minutën e 38-të për malishevasit golin e barazimit 1:1 me kokë nga afërsia e shënoi Assane Diatta.

Gjilani shënon ndaj Malishevës

Kapiteni i Gjilanit, Armend Thaqi, e ka mposhtur Ilir Avdylin, portierin e Malishevës dhe e ka kaluar ekipin e tij në epërsi 1:0.

Thaqi shënoi në minutën e 15-të nga penalltia që e fitoi Oltion Bilalli, e që u akordua pas rishikimit të situatës në VAR. Ai u pengua në zonë nga qendërmbrojtësi Donart Vitija. 

Ndeshja që po luhet në terrenin me bar sintetik në Gjilan i takon xhiros së 22-të të Superligës.

Llapi shënon gol të hershëm ndaj Prishtinës së Re

Hasan Hyseni e ka kaluar Llapin në epërsi ndaj Prishtinës së Re, në ndeshjen e xhiros së 22-të të elitës së futbollit të Kosovës.

Ndeshja po luhet në fushën me bar artificial në Hajvali, ku Prishtina e Re është vendëse.

Hyseni pasi mori top të mirë nga kapiteni Arbnor Ramadani, u shmang mirë në zonë dhe shënoi për 1:0 në minutën e tetë.