Leverkuseni mahnitës, 48 ndeshje pa humbje për Xhakën me bashkëlojtarë

Një supergol i Granit Xhakës në minutën e 12-të i hapi rrugë një tjetër fitoreje të madhe të Bayer Leverkusenit.

Të dielën pasdite, Leverkuseni fitoi 5:1 ndaj Eintracht Frankfurtit. Ndeshja në Frankfurt i takoi xhiros së 32-të të Bundesligës gjermane.

Leverkuseni nuk di për humbje në këto 32 xhiro, madje edhe për kohë më të gjatë. Skuadra e Xabi Alonsos, që lider të mesfushës e ka Xhakën, është në seri të mahnitshme prej 48 ndeshjeve pa humbje.

Leverkuseni e ka siguruar titullin e kampionit të Gjermanisë, për herë të parë në histori. Tani është dy ndeshje larg që ta përfundojë gjithë edicionin pa pësuar disfatë. Asnjë skuadër gjermane nuk e ka arritur këtë.

Me fitoren e së dielës, Frankfurti ka barazuar rekordin e Benficës, sa i takon futbollit evropian, për ndeshje pa humbje. Sa i takon pesë ligave të mëdha, Bayer Leverkuseni tashmë e ka vendosur rekordin dhe vazhdon ta forcojë atë.

Pas golit të hershëm të Xhakës me goditje nga distanca, Frankfurti barazoi në 1:1 në minutën e 32-të. Realizator ishte Hugo Ekitike.

Por Leverkuseni u përgjigj edhe më fuqishëm. Patrick Schick shënoi për 2:1 në minutën e 44-t. Në pjesën e dytë realizuan edhe Exequiel Palacios, Jeremie Frimpong e Victor Boniface.

Palacios e Boniface shënuan nga pika e bardhë.

Xhaka la fushën në minutën e 72-të pasi kreu punën me sukses të plotë dhe fitorja u sigurua.

Leverkusenin e presin potencialisht edhe pesë ndeshje deri në fund të kampanjës së jashtëzakonshme.

Më 9 maj e luan ndeshjen e kthimit gjysmëfinale të Ligës së Evropës ndaj Romës. Në Romë, Leverkuseni kishte fituar 2:0, të enjten. Më pas i ka ndeshjet me Bochumnin dhe Augsburgun në Bundesligë, më 12 e 18 maj.

Më 25 maj luan në finale të Kupës së Gjermanisë me Kaiserslauternin. Nëse ndahet mirë me Romën në gjysmëfinalen e dytë, Bayeri do të paraqitet edhe në finale të Ligës së Evropës, që në program është më 22 maj.

Në Bundesligë, Bayer Leverkuseni udhëheqë me 84 pikë. Tani e presin javë vendimtare për të thyer rekordin e veçantë të Gjermanisë dhe për të shtuar edhe dy trofe.

Xhaka i ka tri gola në Bundesligë. Por kontributi i tij në lojë është vazhdimisht shumë i lartë. Kështu ishte edhe të dielën, kur kontributit të zakonshëm ia shtoi edhe një supergol.

Xhaka shënon eurogol nga distanca

Granit Xhaka ka realizuar një super gol ndaj Frankfurtit të dielën, në ndeshjen që Bayer Leverkuseni po e luan si mysafir.

Xhaka shënoi nga distanca në minutën e 12-të pas një pasimi nga Adam Hlozek për 0-1.

Frankfurti po lufton që të sigurojë një vend në tabelë për Europa League